Бес жылға сотталып, шартты жаза алып, кейін "пробацияны бұзды" деген айыппен қайта түрмеге қамалған белсенді Қайрат Қылышев 30 желтоқсанда бостандыққа шықты. Белсенді тағы алты ай әкімшілік қадағалауда болады. Қылышев Азаттыққа "үкімет тағдырымды өзгерте алатын шығар, бірақ ойымды өзгерте алмады" деді.
Сөзінше, таңғы жетіде оны Алматы облысы Заречный кентіндегі жазаны өтеу мекемесінен Қаскелең қаласындағы үйіне апарып тастаған. Оның түрмеден босап шығатынын естіген басқа белсенділер Қылышевтің үйіне барған.
"Жағдайым жақсы. Қуаныштымын", – деді Қылышев дүйсенбі күні Азаттыққа.
– Заңсыз мерзімімді толық өтеп шықтым. Енді алты ай әкімшілік қадағалауда боламын. Осы бойынша 31 желтоқсан түске дейін Қарасай ауданы полициясына барып, тіркеуге тұруым керек. Бұдан бөлек, 5 жылға қоғамдық-саяси жұмыспен айналысуға салынған тыйым бар. Бұл қамаудан шыққан соң есептеледі, – деді Қылышев.
Белсенді "Қазақстан билігі халықтың мәселесін шеше алмайды, түрмеге отырғызып шешеді. Әділдік жоқ. Менің ойым да өзгерген жоқ" деп айтты.
– Халық үнсіз қалмауға тиіс, әрқашан талаптарын айтып, орындатуы керек. Сөз еркіндігі болуы қажет. Ата заңымызда бұл жазылып тұр, – деді белсенді.
Қайрат Қылышев 2021 жылғы 11 қазанда "тыйым салынған ұйым жұмысын ұйымдастырды және оған араласты" деген айыппен (405-бап, 1, 2-бөліктері) бес жылға бостандығынан айырылған. 2022 жылы көктемде сот оның қалған бөлігін шартты жазаға алмастыру туралы өтінішін орындап, белсенді қамаудан шыққан еді. 2023 жылы маусымда "пробацияны бұзды" деген айыппен түрмеге қайта қамалды.
Қоғамдық-саяси мәселелерге байланысты түрлі акцияға қатысып жүрген белсендіні тыйым салынған, тіркелмеген "Көше" партиясын құруға араласты деп айыптаған еді. Қазақстан билігі бұл ұйымды оппозициялық саясаткер, экс-банкир Мұхтар Әблязов жетекшілік ететін "Қазақстанның демократиялық таңдауы" (ҚДТ) қозғалысымен байланыстырады. Екеуін де Қазақстан билігі экстремистік ұйым деп таныған. Бірақ Еуропарламент қарарында екі қозғалысты "бейбіт оппозициялық ұйымдар" деп атаған.
Белсенді "заңсыз үкім шықты, айыпқа әлі де келіспеймін" деді.
Бұған дейін құқық қорғаушылар Қайрат Қылышевті "саяси тұтқындар" қатарына қосқан. Ресми Астана елде "саяси тұтқын" да жоқ, саяси көзқарасына бола қудалауға түскен де ешкім жоқ дейді.
