26 қаңтарда аннексияланған Қырымда ұсталған кемінде 25 Қырым татары Симферополь сотының шешімімен қамалды. Бір күн бұрын олар Киев аудандық соты ғимаратының алдында жақтастарын қолдағаны үшін ұсталған еді.
25 қаңтарда ондаған Қырым татары "Хизб ут-Тахрир" діни қозғалысына қатысты қозғалған қылмыстық іс бойынша қамалған алты адамды қолдау үшін сот алдына барған. Сот отырысы кезінде полиция 30-дан астам адамды ұстады. Кейін басым бөлігіне "халықты бір жерге жинап, қоғам тәртібін бұзды" деген айып тағылды.
Жұма күні кешке сот 25 қаулы шығарған. 25 жауапкер 10-15 күн аралығында қамалды. Біреуіне 20 мың рубль көлемінде (288 доллар) айыппұл салынды.
"Хизб ут-Тахрир" – ислам діні бағытындағы халықаралық қозғалыс. Ол көп елде заңды жұмыс істейді, бірақ 2003 жылдан бастап Ресейде террористік ұйым деп танылған. 2005 жылдан бері қозғалысқа Қазақстан да тыйым салған.
2014 жылы Қырымды аннексиялағаннан кейін Ресей билігі түбекте тұратын белсенділерді "қозғалысқа мүше болды" деп айыптап, қудалай бастаған. Басым бөлігі – Қырым татарлары. Әдетте полиция тінту кезінде табылған діни әдебиет негізінде ғана оларға "терроризм" бабымен айып тағады. Қазіргі мәлімет бойынша, шамамен 300-ден астам адам түрмеде отыр. Халықаралық құқық қорғау ұйымдары оларды саяси тұтқын деп таныған. Қырым татарлары өздерін түбектің аннексияланғанына келіспегені үшін қудалап жатыр деп біледі.
