Қазақстан халқы ассамблеясының екі күндік сессиясы қарсаңында президент Қасым-Жомарт Тоқаев аталған консультативтік–кеңес органы төрағасының орынбасарларын ауыстырды.
Бұған дейін төраға орынбасарлары болған Майя Бекбаева мен Зәкіржан Кузиев қызметінен босатылды, деп хабарлады Ақорда сайты. Ассамблея төрағасының орынбасарлары қызметіне Наталья Дементьева мен Тауфик Каримов тағайындалған.
Дементьева 2021 жылы қаңтарда мәжіліс депутаты болып сайланған. Оған дейін шамамен бес жыл Көкшетау гуманитарлық-техникалық лицейдің директоры болды. "Қазақстан" телерадиокорпорациясының Ақмола облысындағы бөлімшесінде бірнеше жыл істеген. Тауфик Каримов – "Қазақстандық татар және башқұрт конгрессі" қоғамдық бірлестігінің басқарма төрағасы, Қазақстан Жазушылар одағының мүшесі, Татарстан жазушылар одағына мүше.
Қазақстандық тележүргізуші Майя Бекбаева және Алматы облыстық мәслихатының депутаты Зәкіржан Кузиев 2020 жылдың қарашасынан бері ассамблея төрағасының орынбасары қызметін атқарған. Оларды сол кезде Ассамблея төрағасы Нұрсұлтан Назарбаев ұжымға таныстырған.
Былтыр 28 сәуірде бұрынғы президент Нұрсұлтан Назарбаев ассамблея жетекшілігін Қасым-Жомарт Тоқаевқа берген, бірақ осы ұйымның құрметті төрағасы атағын қалдырған. Қаңтар оқиғасынан кейін Назарбаев Қауіпсіздік кеңесінің төрағасы қызметінен айырылды, артынша Назарбаевтың Қауіпсіздік кеңесі мен Ассамблеяға мәңгі төрағалығын жоятын түзетулер де енгізілді.
28 сәуірде 30-сессияда Ассамблея мүшелері бұған дейін депутаттық өкілеті тоқтатылған Владимир Тоқтасыновтың орнына жаңа депутат сайлайды деп айтылады. 29 сәуірде Қазақстан халқы ассамблеяның "Халық бірлігі – жаңарған Қазақстанның түпқазығы" атты сессиясы өтеді.
Қазақстан халқы ассамблеясы 1995 жылы 1 наурызда құрылған. Оның мақсаты – "этностар арасындағы келісімді әрі қарай нығайту" деп айтылады. Бірақ кейбір сарапшылар аталған институт Нұрсұлтан Назарбаевтың "өкілетін ұзартуды заңдастыру үшін" керек болды деп санайды.
