Қытайдың Алматыдағы консулдығы алдында он айдан бері наразылық өткізіп жүрген топты 9 желтоқсанда полиция тағы ұстады. Куәгерлер ұстау кезінде зейнеткер Халида Ақытханның талып қалғанын, белсенді Байболат Күнболатұлына күш қолданылғанын хабарлады.
Алматы тұрғыны Гаухар Құрманалиеваның сөзіне қарағанда, бейсенбі күні консулдық маңына Қытайда қамалған туыстарын босатуды талап еткен алты адам барған. Арасында Шыңжаңда қамалған үш ұлын қайтаруды талап етіп жүрген зейнеткер Халида Ақытхан мен Қытайда қамалған інісіне араша сұраған белсенді Байболат Күнболатұлы да бар. Полицияның оларды ұстау кезінде күш қолданғаны хабарланды.
Youtube'тегі QaJet арнасы полицияның наразылармен бірге сол маңда болған барлық адамды, арасында блогерлер де бар, ұстап, автобусқа отырғызғанын хабарлады. Видеода полицияның белсенді Байболат Күнболатұлын автобусқа күшпен отырғызып жатқаны көрінеді. Сәлден соң Халида Ақытхан талып қалған. Автобустағылар жедел жәрдем шақыруды сұрады.
Әзірге наразылардың қай жерде екені белгісіз. Телефондары сөніп тұр.
Медеу аудандық полиция басқармасы әзірге жауап бермеді.
Қытайдың Шыңжаң өлкесінде "жазықсыз қамалған немесе бостандығы шектелген" туыстарын Қазақстанға қайтаруды талап еткен бір топ адам ақпан айынан бері Қытайдың Алматыдағы консулдығы алдында наразылық акциясын өткізіп келеді. 9 желтоқсанда олардың акция өткізгеніне 305 күн болды.
Наразылар бұған дейін "бейбіт жиын өткізу тәртібін бұзды" деп айыпталып, жалпы сомасы төрт миллион теңгеге дейін айыппұл төлеуге мәжбүр болған. Полиция оларды кеше, 8 желтоқсанда да ұстап, бірнеше сағаттан кейін босатқан.
Шамамен 10 айға созылған акция кезінде Қытай консулдығынан наразылар алдына ешкім шықпады. Жергілікті полиция наразы топты консулдық маңына жібермей, аумақты көлікпен бақылап келеді.
Наурыз айында Қытайдың Қазақстандағы елшісі Шыңжаңда қамалғандардың "Қытай азаматы" екенін және олардың "Қытай заңын бұзғанын" айтқан. Қазақстан сыртқы істер министрлігі "өзге елдің ішкі ісіне араласа алмайтынын" алға тартып келеді.
Халықаралық ұйымдар мен Батыс елдері Пекинді Шыңжаң өлкесінде ұйғыр, қазақ, қырғыз және өзге де мұсылмандарға "геноцид" жасады деп айыптаған. Пекин мұны жоққа шығарған.
