Жеңіс Қасымбек: Батыс пен шығысты жалғайтын Қазақстанның транзиттік рөлі артып келеді
АСТАНА. ҚазАқпарат - Еуразия құрлығының ұлан-ғайыр даласын алып, Еуропа мен Азияны жалғап жатқан Қазақстанның транзиттік әлеуеті туралы әңгіме аз айтылған жоқ. Елбасы Нұрсұлтан Назарбаев айқындаған стратегияға сәйкес, транзиттік әлеуетті тиімді пайдалануға кірісіп кеткеніміз де бар. Бұндай ауқымды жұмысқа шетелдіктер де өз бағасын беріп жатқаны соның айғағы. Баға берді демекші жақында Президент Нұрсұлтан Назарбаевпен кездесуінде Қытай Төрағасы Си Цзиньпин мырза «Қазақстан Еуразия құрлығындағы транзит тасымалының чемпионы» деп бағалаған еді. Расында, бүгінгі таңда Қазақстан территориясы арқылы Қытай мен Еуропа арасына қатынайтын 15-тен астам транзиттік бағыт бар екен.. Батыс пен шығысты жалғайтын үлкен басымдыққа ие маңызды күре жолдар Қазақстан арқылы өтеді. Айталық, «Батыс Еуропа - Батыс Қытай» транзиттік авто дәлізі ел экономикасына қомақты үлес қосары сөзсіз. Осы және өзге де мәселелерге байланысты ҚР Инвестициялар және даму министрі Жеңіс Қасымбек мырзамен сұхбаттасқан едік.