20 მაისს კახეთში დაკავებული ყველა პირი გაათავისუფლეს
გაერთიანებულ პროცესზე, 14 დაკავებულის შემთხვევაში დაცვის მხარემ სხდომის გადადების შესახებ შუამდგომლობა დააყენა იმ მოტივით, რომ მათ ვერ შეძლეს საქმის მასალების და მტკიცებულებების დროულად გაცნობა, რაზეც მოსამართლე, იოსებ აბრამიძე დაეთანხმა და 14 დაკავებული სასამართლო სხდომიდან გაათავისუფლა.
გურჯაანის რაიონულ სასამართლოში საქმეზე მორიგი პროცესი 19 ივნისს, 13:00 საათზე გაიმართება.
პარალელურად, სიღნაღის რაიონული სასამართლო განიხილავდა 20 მაისს საგარეჯოს პოლიციასთან დაკავებული ლაშა ფარულავასა და გიორგი ლომიძის საქმეებს. მოსამართლემ ორივე მათგანი კონკრეტული გადაწყვეტილების გარეშე გაათავისუფლა. მათ საქმეზე მორიგი პროცესი 30 ივნისს ჩაინიშნა.
მანამდე, თითქმის 24-საათიანი დაკავების შემდეგ პარტია "დროას" ლიდერი ზაჰესის წინასწარი დაკავების იზოლატორიდან გაათავისუფლეს.
გუშინ, 20 მაისს განვითარებული მოვლენებისას ჯამში 19 ადამიანი დააკავეს, მათ შორის, 16 ყვარლის ტბასთან გამართულ აქციაზე, მოგვიანებით, თელავში დააკავეს ელენე ხოშტარია და საგარეჯოს პოლიციასთან "ნაციონალური მოძრაობის" ორი წევრი.
სამართალდამცავებმა ყველა მათგანი წვრილმანი ხულიგნობისა და სამართალდამცავი ორგანოების თანამშრომლის კანონიერი მოთხოვნის დაუმორჩილებლობის ბრალდებით აიყვანეს.
„ყვარლის ტბის“ მიმდებარე ტერიტორიაზე საპროტესტო აქცია დილიდან მიმდინარეობდა. აქცია მას შემდეგ დაიგეგმა, რაც 19 მაისს გავრცელდა ინფორმაცია, რომ სასტუმროში იმყოფებოდნენ რუსეთის საგარეო საქმეთა მინისტრის, სერგეი ლავროვის ოჯახის წევრები და სასტუმროში იგეგმებოდა ლავროვის ქალიშვილის მაზლის საქორწინო წვეულება.