თავდაცვის ყოფილი მინისტრის, ორგანიზაცია „სამოქალაქო იდეას“ თავმჯდომარის თინა ხიდაშელის შეფასებით, უკრაინის ომის ფონზე, სრულიად უპრეცედენტო ერთად დგომის მაგალითები შექმნა დასავლეთმა და დემოკრატიულმა სამყარომ. როგორც მან ჟურნალისტებს განუცხადა, საქართველო, რომლის ტერიტორიები რუსეთს აქვს ოკუპირებული, სრულიად ამოვარდნილია ამ პროცესიდან.
„მთელ ამ პროცესში საქართველო გამოჩნდა ისეთ მოთამაშედ, როგორც პატარა ბავშვები გაბრაზებულები იქცევიან, მუდმივად ჯიბრით და ჯინით საუბრობენ. საქართველო, რომლის ტერიტორიების ნაწილი იმავე ქვეყანას აქვს ოკუპირებული, ვინც უკრაინაში აგრესიას ახორციელებს, სამწუხაროდ, სრულიად ამოვარდნილია ევროპის ახალი უსაფრთხოების არქიტექტურიდან, დისკუსიებიდან, იმ უზარმაზარი მხარდაჭერის პროგრამებიდან, რომელიც მოლდოვისთვის და არა მხოლოდ უკრაინისთვის, დღეს ჩვენს პარტნიორ სახელმწიფოებში მუშავდება. რა თქმა უნდა, ეს ძალიან სამწუხაროა. ვფიქრობ, ამ მოვლენას ორი მთავარი მიზეზი აქვს. ერთი არის შიში, რაც ნამდვილად არ უნდა გამოვრიცხოთ. როდესაც ხარ უცოდინარი, უცოდინრობას თან ახლავს შიში იმიტომ, რომ არ შეგიძლია გათვალო, არ შეგიძლია ანალიზი გააკეთო. სამწუხაროდ, ამ შემთხვევაში ხელისუფლებაზე ვსაუბრობთ, მაგრამ ეს არის ბუნებრივი პროცესი. გულწრფელად მჯერა, რომ ერთი ნაწილისთვის ეს ნამდვილად არის შიშით გამოწვეული, მაგრამ საქართველოს ხელისუფლებაში არიან ადამიანები, რომლებსაც სრულიად ერთმნიშვნელოვანი დღის წესრიგი აქვთ. თუ ვინმეს აქამდე ეჭვი ეპარებოდა, ვფიქრობ, დღეს ეს სრულიად გამჭვირვალეა იქიდან გამომდინარე, რომ კრემლში დაწერილი სახელმძღვანელოებით ხელმძღვანელობენ. უკრაინაში რუსული აგრესიის ფონზე, მთავარ ამოცანად საქართველოს ხელისუფლებამ დაისახა აშშ-ის და ევროპის დემონიზაცია საქართველოში”,-განაცხადა ხიდაშელმა.
გარდა ამისა, მან 24 თებერვალს დაგეგმილ უკრაინის სოლიდარობის აქციაზე ისაუბრა და აღნიშნა, რომ ხვალინდელ აქციას შეუერთდება.
„ხვალ არის უკრაინაში რუსული აგრესიის წლისთავი. ამიტომ, ჩემთვის სრულიად ერთმნიშვნელოვანია სად უნდა ვიყო ამ დროს იმისთვის, რომ მცირედით, მაგრამ იმ ტიპის სოლიდარობა მაინც ვაჩვენოთ, რაც შეგვიძლია”,-განაცხადა ხიდაშელმა.
