საქართველოს ყოფილი სახალხო დამცველი ნინო ლომჯარია საფრანგეთის პრეზიდენტმა ემანუელ მაკრონმა ღირსების ეროვნული ორდენით დააჯილდოვა. როგორც საფრანგეთის საელჩო იუწყება, ლომჯარიას შეხვდა ელჩი შერაზ გასრი, რომელმაც მას დაჯილდოების შესახებ აცნობა.
„ჯილდო ნინო ლომჯარიას გადაეცემა მნიშვნელოვანი როლისთვის, რომელიც მან ქართული დემოკრატიის ამ ერთ-ერთი საყრდენი ინსტიტუციის სათავეში შეასრულა. გულწრფელად ვულოცავთ მას", - აცხადებს საფრანგეთის საელჩო საქართველოში.
2 თებერვალს ნინო ლომჯარიას ამერიკის შეერთებული შტატების სახელმწიფო დეპარტამენტმა გადასცა ადამიანის უფლებათა დამცველის ყოველწლიური გლობალური ჯილდო.
ნინო ლომჯარია 2017 წლის 7 დეკემბრიდან 2022 წლის 8 დეკემბრამდე იკავებდა საქართველოს სახალხო დამცველის თანამდებობას.