სახლში ხართ, სავარძელში მოკალათებული და ახალ ან ძველ საყვარელ ფილმს უყურებთ. უცებ აღმოაჩენთ, რომ ეს მოცემულობა თავს კარგად არ გაგრძნობინებთ და ისურვებდით, რამე განსხვავებული სცადოთ. თავს მოწყენილად გრძნობთ, თუმცა არ იცით რა გააკეთოთ. ასეთ დროს კარგი იქნება სოციალურ მედიას თავი აარიდოთ და ინფორმაციის დაუსრულებლად “სქროლვის” გარდა სხვა აქტივობით შეიცქიოთ თავი.
მოწყენილობის დროს წერა ერთ-ერთი საუკეთესო საშუალებაა. არ არის აუცილებელი რომანი, ლექსი ან ნოველა დაწეროთ, უბრალოდ სცადეთ საკუთარ თავთან იყოთ გულწრფელები და ფურცელზე გადმოიტანოთ ის, რასაც რეალურად გრძნობთ ან ფიქრობთ. ეს საკუთარი თავის უკეთ გაცნობაში დაგეხმარებათ.
იქნებ დოკუმენტალისტიკა გაინტერესებთ? ცხოველთა სამყარო, ისტორიული მოვლენები, ხელოვნების ნიმუშები ან სხვა ნებისმიერი რამ, რაზეც შეგიძლიათ საინტერესო და საგანმანათლებლო დოკუმენტური მასალები იპოვოთ. ყველა ადამიანს აქვს თავისი ინტერესის სფერო, სცადეთ დაიწყოთ იმის კეთება, რაც საგანმანათლებლოც იქნება და მიმზიდველიც.
დაიწყეთ ახალი ენის შესწავლა. ყოველ დღე რამდენიმე უცხო სიტყვის ათვისებაც კი მნიშვნელოვნად აუმჯობესებს მეხსიერებას და გონების მუშაობას. თუ არ გსურთ დაიტვირთოთ, მაშინ უბრალოდ ჩართეთ საყვარელი მუსიკა და იცეკვეთ. შეიძლება გაგეცინოთ, მაგრამ დისნეის სიმღერების მოსმენა პოზიტიური ენერგიით აგავსებთ და ბავშვობის მხიარულ მოგონებებშიც დაგაბრუნებთ.
თუ წიგნის წაკითხვა არ გსურთ, მაშინ მოუსმინეთ აუდიო წიგნებს. მოსინჯეთ თქვენი თავი ახალ სიტუაციებში. სცადეთ მოამზადოთ საყვარელი კერძი, დახატოთ, არ აქვს მნიშვნელობა გამოგდით თუ არა. უბრალოდ დახატეთ თქვენი ემოციები ზედმეტი ძალისხმევის გარეშე.
დაფიქრდით თქვენს მიზნებზე და დაისახეთ გეგმა. ასე მიხვდებით რა ნაბიჯების გადადგმა გჭირდებათ. უყურეთ მედიტაციურ ვიდეოებს ან ივარჯიშეთ. შეგიძლიათ ჩაეწეროთ მუსიკის ან ცეკვის წრეზე. ფიზიკური აქტივობა მნიშვნელოვანი და სასარგებლოა როგორც განწყობის, ისე ჯანმრთელობისთვის.
წყარო: Good House Keeping
ფოტო: Unsplash
