ნელი დოროყაშვილის ადვოკატი: ასეთი სამართლებრივად სამარცხვინო განაჩენი არ მომისმენია არასდროს
„ასეთი სამართლებრივად სამარცხვინო განაჩენი არ მომისმენია არასდროს. ასეთი განაჩენის და მსხვერპლის დამუნათების მერე რომ მსხვერპლებს მოუწოდებ პოლიციაში წასვლისკენ, ამაზე დიდი ირონიაც არ ვიცი.
ქალბატონო მოსამართლე, ალბათ, თქვენს დღევანდელ დასაბუთებას (ძალიან კარგია რომ საჯარო იყო) რომ მოისმენთ, ოდესმე შეგრცხვებათ თქვენივე სიტყვების.
პ.ს. შეგატყვეთ ქალბატონო მოსამართლე გაბრაზება, რაც ალბათ, გუშინ თქვენი პასუხის საჯარო კრიტიკით იყო გამოწვეული", - დაწერა „ფეისბუკის" პირად გვერდზე ადვოკატმა ანა თავხელიძემ.
თბილისის საქალაქო სასამართლოს მოსამართლე ხათუნა ხარჩილავამ ყოფილ ცოლზე ძალადობაში ბრალდებული საქართველოს პირველი ჩოგანი ნიკოლოზ ბასილაშვილი გაამართლა.
საქმის განხილვა თბილისის საქალაქო სასამართლოში ორ წელზე მეტხანს მიმდინარეობდა. მრავალთვიანი განხილვებისა და მოწმეთა დაკითხვის შემდეგ, მოსამართლე ხათუნა ხარჩილავამ განაჩენი დღეს, 21 ოქტომბერს, გამოაცხადა. ამ გადაწყვეტილებითვე გაუქმდა ჩოგბურთელის წინააღმდეგ გამოყენებული აღკვეთის ღონისძიება - 100-ათასლარიანი გირაო.
ნიკოლოზ ბასილაშვილი პოლიციამ, ყოფილ ცოლზე ძალადობის ბრალდებით, 2020 წლის 22 მაისს დააკავა. 24 მაისს სასამართლომ მას აღკვეთის ღონისძიებად 100-ათასლარიანი გირაო შეუფარდა და გაათავისუფლა. მას ბრალი (სსკ-ის 126¹-ე მუხლი) არასრულწლოვანი შვილის თანდასწრებით ყოფილ მეუღლეზე ფიზიკური ძალადობის გამო წარედგინა. მოგვიანებით პროკურატურამ ბასილაშვილის ბრალდება დააზუსტა და მას ძალადობის რამდენიმე ეპიზოდთან ერთად, ფსიქოლოგიურ და ეკონომიკურ ძალადობასაც ედავებოდა.