ვფიქრობ, არასწორ ადგილას აწყდებიან კედელს, „ნაციონალურ მოძრაობაში” არავითარი დაპირისპირება არ არის – არავითარ მორალური, ზნეობრივი და პოლიტიკური პასუხისმგებლობა არ უნდა ჰქონდეთ გარკვეულ ადამიანებს ისაუბრონ “ნაციონალური მოძრაობის” “ლიდერშიპის” მიმართ, მათ შორის სოსო თოფურიძეს, – ამის შესახებ ფრაქცია “ნაციონალური მოძრაობის” თავმჯდომარე ხატია დეკანოიძემ განაცხადა.
მისი თქმით, ამ ადამიანებს არ უნდა დაავიწყდეთ საკუთარი პასუხისმგებლობა იმ პრობლემებთან დაკავშირებით, რაც იყო სისტემაში წინა ხელისუფლების დროს და მათ უნდა ახსოვდეთ საკუთარი პასუხისმგებლობა იმასთან დაკავშირებით, რის გამოც “ნაციონალური მოძრაობა” 2012 წლის შემდეგ აღარ არის ხელისუფლებაში.
“პარტიაში ერთმანეთში არავითარი დაპირისპირება არ გვაქვს. ზრდასრული ადამიანები, პოლიტიკოსები ვართ, ვისაც ერთმანეთთან საუბარი შეუძლიათ. რაც შეეხება ახლა წამოტივტივებული ადამიანების სოციალურ ქსელში გავრცელებულ სტატუსებს, მინდა, მათ ვუთხრა და შევახსენო, რომ ყველა ის ადამიანი, რომლის უშუალო პასუხისმგებლობაა ის, რომ 2012 წლის შემდეგ “ნაციონალური მოძრაობა” აღარ არის ხელისუფლებაში და ათი წლის განმავლობაში ამ რეჟიმთან გვიწევს ძალიან მძიმე მდგომარეობაში ყოფნა, ნუ ავიწყდებათ, რომ ამ ადამიანების პასუხისმგებლობა არ არის თითქოს სახელმწიფოს წინაშე. ადამიანები, ვინც წლების განმავლობაში არიან პოლიტიკაში და ვისაც რაიმე სახის პოლიტიკური ანალიზის უნარი აქვს ან ექსპერტობაზე აქვს რაიმე სახის პრეტენზია, “ნაციონალურ მოძრაობას” დაუპირისპირდა. მინდა, ყველას ვთხოვო, მათ, ვისაც ახლა გადაწყვიტეს, პარტიის შიდა საქმეებში ჩარევა – ეს არის ბიძინა ივანიშვილის დიდი ინტერესი ათი წლის განმავლობაში და ახლა კედელს არასწორ ადგილას აწყდებიან, “ნაციონალურ მოძრაობაში” არავითარი დაპირისპირება არ არის. ჩემი დამოკიდებულება იცით “ნაციონალური მოძრაობის” მმართველობის დროს სისტემაში არსებულ პრობლემებზე, რაც ახლა “ქართულმა ოცნებამ” წარმატებით გადმოიღო, არ მიყვარს მორალზე აპელირება, მაგრამ არავითარი პასუხისმგებლობა, არც მორალური, არც ზნეობრივი, არც პოლიტიკური გარკვეულ ადამიანებს არ უნდა ჰქონდეთ “ნაციონალური მოძრაობის” “ლიდერშიპის” მიმართ, მათ შორის სოსო თოფურიძეს. არ ვიცი, შეიძლება, “ფეიკ” გვერდია, მაგრამ ამ ადამიანებს საკუთარი პასუხისმგებლობა უნდა ესმოდეთ, რა მდგომარეობაში აღმოჩნდა ეს ქვეყანა. დიდი იმედი მაქვს, ეს ადამიანები და ბევრი მათგანი გაითავისებს საკუთარ პასუხისმგებლობას,”- განაცხადა დეკანოიძემ.
კითხვაზე, რამდენად შეიძლება სიმართლე იყოს გავრცელებული ინფორმაცია იმასთან დაკავშირებით, რომ სოსო თოფურიძის უკან ვანო მერაბიშვილი შეიძლება იდგეს, დეკანოიძე პასუხობს, რომ სოსო თოფურიძე მუშაობდა დათა ახალაიასთან კონსტიტუციური უსაფრთხოების დეპარტამენტში და არ იცის რა კავშირები შეიძლება არსებობდეს და არც ამ კონსპირაციაში არ შევა.
“ეს ყველაფერი არის დიდი კამპანია, რომლითაც ადამიანებზე მანიპულირება ადვილია. განსაკუთრებით, ახლა მიხეილ სააკაშვილის სიცოცხლის თემით ჟონგლიორობა სოციალურ ქსელში ძალიან სამარცხვინოა. გაცილებით მეტი პასუხისმგებლობა მაქვს, ვიდრე კონსპირაციებში წასვლა,”- განაცხადა დეკანოიძემ.
მან ასევე უპასუხა კითხვას, რამდენად იმსახურებს ნიკა მელია პარტიაში თავმჯდომარის პოსტს და აღნიშნა, რომ ის არ იქნებოდა პარტიაში, რომ ფიქრობდეს, რომ მელია ამას არ იმსახურებს.
“ნიკა არის ადამიანი, რომელმაც ძალიან ბევრი გააკეთა პარტიისთვის და მოვიდა ძალიან რთულ დროს, იცით ეს ეპოპეა როგორიც იყო – დაკავება, ზეწოლა, წნეხი და ახლა სუს- ის მიერ მართული პროცესით ნამდვილად გულშემატკივრების მანიპულირება არის ძალიან ცუდი,”- განაცხადა დეკანოიძემ.
