საქართველოში ევროკავშირის წარმომადგენლობა, ამერიკის შეერთებული შტატების, დიდი ბრიტანეთის, ესპანეთის, ნიდერლანდების, ნორვეგიის, იაპონიის, ისრაელის, საფრანგეთის, შვედეთისა, შვეიცარიის და ჩეხეთის რესპუბლიკის საელჩოები და გაეროს განვითარების პროგრამა დადებითაც აფასებენ "პრაიდის კვირეულის" გამართვას. ერთობლივ განცხადებაში აღნიშნულია, რომ ამ კვირეულის გამართვას უნდა მოჰყვეს ადამიანის უფლებათა დაცვის გაძლიერება.
"მივესალმებით საქართველოს შემდგომ ნაბიჯებს ადამიანის უფლებების დაცვისა და ამ მხრივ საერთაშორისო ვალდებულებების შესრულების გზაზე, მათ შორის ადამიანის უფლებათა ეროვნული სტრატეგიისა და სამოქმედო გეგმის დამტკიცების გზით.
საქართველოს მოქალაქეები სულ უფრო მეტად უჭერენ მხარს მრავალფეროვნებას და მიაჩნიათ, რომ ლგბტქი+ პირთა უფლებების დაცვა მნიშვნელოვანია. ეს სოციალური ცვლილება სახელმწიფოს პოლიტიკასა და პრაქტიკაზე უნდა აისახოს. უაღრესად მნიშვნელოვანია, რომ საქართველომ ზედმიწევნით შეასრულოს ამ მხრივ აღებული საერთაშორისო ვალდებულებები და სათანადოდ დაიცვას ყველა მოქალაქის უფლებები და თავისუფლებები, მათი შესაძლებლობის, ეროვნული, ეთნიკური თუ სოციალური წარმომავლობის, რასობრივი მიკუთვნების, სქესის, სექსუალური ორიენტაციისა თუ გენდერული იდენტობის მიუხედავად", - აღნიშნულია განცხადებაში.
ამ საჯარო მიმართვაში ხაზგასმულია, რომ პრაიდ კვირეულის აღნიშვნა უსაფრთხოებასთან დაკავშირებულ რისკებსა და ბევრ სხვა სტრესულ ვითარებას უკავშირდება და უამრავი ლგბტქი+ ადამიანი მსგავს გამოწვევებს ყოველდღიურად უმკლავდება.
აქვე განცხადების ავტორები მადლობას უხდიან ხელისუფლებას ამ კვირეულის ფარგლებში გატარებული ღონისძიებების გამო:
"იმედი გვაქვს და გვჯერა, რომ წლევანდელი პრაიდ კვირეული წინ გადადგმული ნაბიჯია ლგბტქი+ თემის უფლებების დაცვის, მათ შორის შეკრებისა და გამოხატვის თავისუფლების უზრუნველყოფის მხრივ...
მადლობას ვუხდით საქართველოს შინაგან საქმეთა სამინისტროსა და პოლიციის თანამშრომლებს, რომელთაც პრაიდ კვირეულის მსვლელობისას, უსაფრთხოების დაცვა და საზოგადოებრივი წესრიგი უზრუნველყვეს. მივესალმებით საქართველოს მთავრობის ადმინისტრაციის ჩართულობას კვირეულის მომზადებისა და კოორდინირების პროცესში.
მოწყვლადი ჯგუფების უფლებების დაცვით, სახელმწიფო მხარს უჭერს ადამიანის ძირითადი უფლებების საყოველთაო დაცვას და ისეთი საზოგადოების მშენებლობას, რომელიც აძლიერებს და იცავს მის ყველა წევრს, გამონაკლისის გარეშე, და აღიარებს და აფასებს მრავალფეროვნებას".
განცხადებაში ასევე საუბარია გასულ წელს, პრაიდის კვირეულის ფარგლებში თბილისში სიძულვილის ჯგუფების მხრიდან მომდარ ძალადობაზე:
"აღნიშნულის გათვალისწინებით, შევახსენებთ საქართველოს მთავრობას, რომ 2021 წლის 5 ივლისის მოვლენები სათანადოდ უნდა იქნას გამოძიებული, ხოლო ძალადობის წამქეზებელი და ჩამდენი ყველა პირი უნდა წარსდგეს კანონის წინაშე".
გასული წლის მოვლენების გათვალისწინებით, როცა ქუჩაში გამოსულმა ადამიანების მასამ ორგანიზებულად იძალადა მედიის 50-ზე მეტ წარმომადგენელზე, წელს „თბილისი პრაიდმა“ უარი თქვა საჯარო მანიფესტაციაზე. ამის მიუხედავად, „კვირეულის“ დაანონსებისთანავე ულტრაკონსერვატორები მის ჩაშლაზე საუბრობენ საკუთარი ტელევიზიის, „ალტ-ინფოს“ ეთერში თუ სხვა პლატფორმებზე.
წელს სიძულვილის ჯგუფების განსაკუთრებული მობილიზება შეიმჩნეოდა "პრაიდის კვირეულის" დასკვნითი ღონისძიებისთვის, ფესტივალისთვის. "ალტ-ინფოსა" და "კონსერვატიული მოძრაობის" მოწოდებით თბილისის ცენტრალურ გამზირზე, პარლამენტის წინ რამდენიმე ათასი ადამიანი შეიკრიბა - აქციაზე ისმოდა ჰომოფობიური და ანტიდასავლური მოწოდებები.
2 ივლისის წინა ღამეს და ამ დღეს სიძულვილის ჯგუფები ცდილობდნენ ხელი შეეშალათ ამ ღონისძიების გამართვისთვის. პოლიციამ 40-ზე მეტი ადამიანი მათი მოთხოვნის დაუმორჩილებლობის გამო დააკავა.