საქართველოში უკრაინის ელჩის, იგორ დოლგოვის ცოლი, ალექსანდრა ლიაშკო პარლამენტის წინ უკრაინის სოლიდარობის აქციაზე სიტყვით გამოვიდა. მან მადლობა გადაუხადა ყველა იმ ადამიანს, რომლებიც აქციებზე დგომით თუ უკრაინისთვის დახმარების მობილიზებით მისი ქვეყნის გვერდითაა ომის დროს. ამავე აქციაზე პირდაპირი ვიდეომიმართვით ჩაერთნენ საქართველოსა და უკრაინის პრეზიდენტები.
"თქვენთან ერთად მოვუსმინე ჩემი მშობლიური უკრაინის პრეზიდენტს. უკრაინის პრეზიდენტი, რომლის მთელი ხალხი ერთიანი ფრონტით გამოვიდა მტერთან საბრძოლველად. უკრაინა იცავს საკუთარ თავისუფლებას, უკრაინა იცავს მთელ სამყაროს. და სამყარო არასოდეს არ იქნება, როგორიც ჩვენ გვინდოდა. აგრესორმა წუხელ ღამეს დაადასტურა, რომ ის არის მომაკვდინებელი, საშიში მხეცი, რომელიც ბირთვული ტერორის წინაშეც არ გაჩერდება. აგრესორი არ ფიქრობს ადამიანებზე, არც მშვიდობიან უკრაინელებზე, არც საკუთარ მოსახლეობაზე. იმპერიები არ არის ხალხისთვის, იმპერიები მხოლოდ ტირანებისთვისაა. ახლა ეს ტირანი ცდილობს ჩვენს დაჩაგვრას, დაპყრობას და დამორჩილებას. ეს არ არის ჩვენთვის, ეს არ არის უკრაინელებისთვის. ეს არ არის ქართველებისთვის.
ჩვენ უკრაინელები ვართ, ჩვენ ავირჩიეთ თავისუფლება და ვიბრძოლებთ ჩვენი არჩევანისთვის. ჩვენ დარწმუნებული ვართ ჩვენს გამარჯვებაში, რადგან სხვა არჩევანი არ გაგვაჩნია. ჩვენ დარწმუნებული ვართ, რადგან ჩვენ გვყავს ძლიერი, დიდებული და ერთიანი ერი. ჩვენ დარწმუნებული ვართ გამარჯვებაში, რადგან ჩვენი პრეზიდენტი არ იმალება ბუნკერში, ის საკუთარ ხალხთან არის. დღეს ის თქვენთან ერთადაც იყო. ის გამოვიდა სიტყვით, რათა თქვენთვის მხარი დაეჭირა და მადლობა გადაეხადა. დიდი მადლობა ჩვენო მეგობრებო, ვინც ყოველ საღამოს მოდიხართ აქ ჩვენი ხალხის მხარდასაჭერად", - თქვა უკრაინის ელჩის მეუღლემ რუსთაველზე, პარლამენტის წინ.
"ძვირფასო მეგობრებო, ახლა ჩვენს მიწაზე მიმდინარეობს სასტიკი ბრძოლები, მაგრამ მტერი გამოფიტულია, მისი მორალური სულისკვეთება ძალიან დაბალია. ჩვენს შეიარაღებულ ძალებთან ერთად დგანან უბრალო ადამიანები. ყველა უკრაინელი - ქალიც, კაციც - ყველაფერს აკეთებს იმისათვის, რომ შეაჩეროს ეს მხეცი. დღეს საშინელი ომის მეცხრე დღეა. ჩვენ ძალიან ბევრი დანაკარგი გვაქვს, ჩვენთან ბავშვები იღუპებიან, მილიონზე მეტი ლტოლვილი გვყავს და ეს რიცხვი ყოველწუთიერად იზრდება.
ჩვენ ნამდვილად ძალიან ბევრს ვკარგავთ, მაგრამ სიმართლე ჩვენს მხარეს არის. მთელი მსოფლიო მხარში გვიდგას ფინანსებით, იარაღით, ჰუმანიტარული დახმარებით. უკრაინა ამას იღებს, მაგრამ მეტი გვჭირდება. ჩვენ მეტი გვჭირდება იმისათვის, რომ დავახრჩოთ ჩვენი ბოროტი მტერი. ჩვენ ძალიან მადლიერები ვართ საქართველოსი. მადლობა გვინდა გადაგიხადოთ ყველას, ვინც ახლა აგროვებს სახსრებს, ნივთებს და ამ სამუშაოს კოორდინაციაშია ჩართული. ასე იქცევიან მხოლოდ ნამდვილი მეგობრები და ჩვენ ნამდვილი მეგობრები ვართ. ყველას დიდი, დიდი მადლობა!" - ასე დაამთავრა ალექსანდრა ლიაშკომ თავისი მიმართვა.
უკრაინაში ომის დაწყების შემდეგ, თბილისში სხვადასხვა ფორმატში ყოველდღე იმართება უკრაინის მხარდამჭერი აქციები.
რუსეთმა უკრაინაში სრულმასშტაბიანი სამხედრო ოპერაცია 24 თებერვალს დაიწყო. მალევე დიდმა ბრიტანეთმა, ამერიკის შეერთებულმა შტატებმა, ევროკავშირის ქვეყნებმა და სხვა სახელმწიფოებმა რუსეთს მკაცრი სანქციები დაუწესეს უკრაინაში ომის დაწყების გამო. რუსეთი ამ დრომდე თავს ესხმის მშვიდობიან მოსახლეობას, ანადგურებს სამხედრო და სამოქალაქო ინფრასტრუქტურას, ბომბავს ქალაქებს, საბავშვო ბაღებს და საავადმყოფოებს.
