ყაზახეთის პრეზიდენტმა განაცხადა, რომ „უფსკულმა მდიდრებსა და ღარიბებს შორის" გამოიწვია საპროტესტო გამოსვლები, რომლებსაც მსხვერპლი მოჰყვა
21 იანვარს, ნავთობით მდიდარი ამ ქვეყნის მოწინავე ბიზნეს სფეროების წარმომადგენლებთან საუბრისას, ტოყაევმა თქვა, რომ საჭიროა "რეალური რეფორმები" და "სოციალური სტრუქტურების ღრმა ტრანსფორმაცია" იმ პრობლემების გადასაჭრელად, რომლებიც საპროტესტო გამოსვლებისას წამოწიეს.
"განსხვავებამ გამოცხადებულ სოციალურ-ეკონომიკურ დღის წესრიგსა და რეალურ ვითარებას შორის კრიტიკულ მასას მიაღწია და ახლა გვჭირდება ჩვენი ეკონომიკური პოლიტიკის სრული განახლება", - განაცხადა ტოყაევმა. "კარგად ცნობილი კორუფციის არსებობის პირობებში, შემოსავლებს შორის განსხვავებებმა დენთის კასრის სიახლოვეს ანთებული ასანთის როლი ითამაშა და ეს სიტუაცია გამოიყენეს ტერორისტებმა, შეიარაღებულმა პირებმა და იმ ორგანიზატორებმა, რომლებიც მათ უკან დგანან", - განაცხადა ტოყაევმა და დასძინა, რომ მან უკვე მიიღო "რთული გადაწყვეტილებები და კვლავაც მიიღებს მსგავს გადაწყვეტილებებს მომავალში".
შორეულ ქალაქ ჟანაოზენში დაწყებული საპროტესტო გამოსვლები საწვავის ფასის მკვეთრი გაძვირების გამო, სწრაფად მოედო მთელ ყაზახეთს და ძლიერი შეტაკებები მოხდა ქვეყნის ყველაზე დიდ ქალაქში, ალმათიში, და სხვა ქალაქებშიც. დემონსტრანტთა უმრავლესობის რისხვა, როგორც ჩანს, მიმართული იყო ტოყაევის წინამორბედის, ნურსულთან ნაზარბაევის წინააღმდეგ, რომელიც ყაზახეთს მართავდა 1989 წლიდან ხელისუფლების გადაცემამდე. ამის მიუხედავად, ფართოდ გავრცელებული აზრის მიხედვით, ის კვლავაც აკონტროლებს ვითარებას კულისებიდან.