რუსეთის თავდაცვის სამინისტროს ინფორმაციით, სუ-39-ის ტიპის ორი რუსული გამანადგურებელი შავი ზღვის თავზე B-1B-ის ტიპის ორ ამერიკულ სტრატეგიულ ბომბდამშენს აედევნა.
რუსეთის თავდაცვის უწყების ცნობით, რუსული გამანადგურებლები თვალს ადევნებდნენ ამერიკულ სამხედრო თვითმფრინავებს, რათა მათ არ დაერღვიათ რუსეთის საზღვარი. მას შემდეგ, რაც ამერიკული ბომბდამშენები უკან გაფრინდნენ, რუსული თვითმფრინავები თავიანთი ბაზირების აეროდრომზე დაბრუნდნენ.
პენტაგონს ამ ინციდენტზე ჯერჯერობით კომენტარი არ გაუკეთებია.
ამავდროულად, სააგენტო „როიტერსი“ აღნიშნავს, რომ შავი ზღვის თავზე მომხდარი ინციდენტი რეგიონში 19 ოქტომბერს აშშ-ის თავდაცვის მდივნის ლოიდ ოსტინის ვიზიტის ფონზე მოხდა. ლოიდ ოსტინი, რომელმაც უკვე გამართა ვიზიტები საქართველოსა და უკრაინაში, ამჟამად რუმინეთში იმყოფება. რეგიონული ტურნეს დროს განხილვის ერთ-ერთი მთავარი თემა სწორედ შავი ზღვის რეგიონის უსაფრთხოებაა.
