ახალგაზრდა იურისტთა ასოციაციის (GYLA) დამკვირვებლებმა კენჭისყრის დღეს 80-ზე მეტი საჩივარი და შენიშვნა დაწერეს. საარჩევნო უბნების დახურვის შემდეგ გამოქვეყნებულ მორიგ ანგარიშში არაერთი შემთხვევაა ჩამოთვლილი, საიდანაც ორის გამო ორგანიზაციამ შედეგების ბათილად ცნობაც მოითხოვა.
მარნეულის # 65 უბანზე გადასატანი საარჩევნო ყუთი, რომლის სიაშიც 40 ამომრჩეველი იყო, საარჩევნო უბანზე ერთ საათსა და 20 წუთში დაბრუნდა, ხოლო მისი ლუქის მთლიანობა დარღვეული იყო. საიას დამკვირვებელმა მოითხოვა გადასატანი საარჩევნო ყუთის ბათილობა;
მარნეულის # 48 უბანზე დაიწერა საჩივარი მარკირების გარეშე ხმის მიცემის ფაქტზე. მიუხედავად ამისა, ამგვარი შემთხვევები კვლავ გაგრძელდა. შედეგად, საიამ საჩივარი დაიწერა საოლქო საარჩევნო კომისიაში და მოითხოვა უბნის ბათილობა.
დარღვევებს შორის საია საგანგებოდ გამოყოფს ამომრჩეველთა ნების კონტროლის პრობლემას უბნების გარე ტერიტორიაზე, 100-მეტრიან რადიუსში შეკრებილი პირების, ე.წ. კოორდინატორების მხრიდან.
როგორც „საერთაშორისო გამჭვირვალობა - საქართველო” (TI) აცხადებს, კენჭისყრის დღის განმავლობაში 140-მდე წვრილი და შედარებით სერიოზული დარღვევა დააფიქსირა და მისმა დამკვირვებლებმა დაწერეს 25 საჩივარი.
დღის განმავლობაში ორგანიზაციამ გამოავლინა დარღვევები, რომლებიც, მათ შორის - სავარაუდო „კარუსელის” არსებობასა და ამომრჩევლებისთვის ფულის გადაცემასაც უკავშირდება.
ორგანიზაციის დამკვირვებლებმა გამოავლინეს დამკვირვებლებისთვის ხელის შეშლის, ზეწოლისა და კენჭისყრის ფარულობის დარღვევის სავარაუდო ფაქტებიც. ანგარიშის თანახმად, უბნებზე იმყოფებოდნენ არაუფლებამოსილი პირები, ხოლო უბნების გარე პერიმეტრზე, 100-მეტრიან რადიუსში შეკრებილი იყვნენ კოორდინატორები.
აღირიცხა სხვა ტიპის დარღვევებიც:
ქუთაისის საარჩევნო ოლქის #124 უბანზე სამივე შემაჯამებელ ოქმში გარკვეული გრაფები წინასწარ იყო შევსებული, მათ შორის მოსული ამომრჩევლის ოდენობა და კომისიის 11 წევრის ხელმოწერაც იყო მითითებული;
ხარაგაულის საარჩევნო ოლქის #37 უბანზე გადასატან ყუთში რეგისტრირებული ამომრჩეველი მივიდა უბანზე და მას სხვა პირის გრაფაში მოაწერინეს ხელი;
ბათუმის საარჩევნო ოლქის #74 უბანზე ამომრჩეველმა ხმა მარკირების პროცედურის გავლის გარეშე მისცა
„სამართლიანი არჩევნებისა და დემოკრატიის საერთაშორისო საზოგადოების“ დამკვირვებელთა მორიგი ანგარიშის თანახმად, „მრავალჯერადი დარღვევები დაფიქსირდა მარნეულის ორ საარჩევნო უბანზე, სადაც გამოვლინდა პირადობის მოწმობის გარეშე ხმის მიცემის არაერთი შემთხვევა, მარკირების შემოწმებისა და ჩატარების გარეშე ხმის მიცემის არაერთი ფაქტი, აგრეთვე ხმის მიცემის ფარულობის დარღვევა“, რის გამოც ორგანიზაციამ ამ უბნებზე კენჭისყრის შედეგების ბათილობა მოითხოვა“.
დღის განმავლობაში გრძელდებოდა უბანზე ყოფნის უფლების მქონე პირების მიერ ამომრჩეველთა აღრიცხვა და მათი პირადი ინფორმაციის მესამე პირებისთვის გადაცემა, რაც ამომრჩეველთა ნების კონტროლზე მიანიშნებს.
„სამართლიანმა არჩევნებმა“ უბნის გარეთ მიმდინარე პროცესების შესახებ ინფორმაცია 121 უბნიდან მიიღო. ანგარიშის თანახმად, უბნების 20%-ზე, 100-მეტრიან რადიუსში, შეინიშნებოდა პირთა საეჭვო შეკრება; 13.3%-ზე - „ამომრჩეველთა სახელობითი აღრიცხვა პარტიის, არასამთავრობო ორგანიზაციის ან სხვის მიერ“; ხოლო უბნების 18.3%-ზე - შეინიშნებოდა ამომრჩეველთა ორგანიზებული და არაერთჯერადი მობილიზება/ტრანსპორტირება საარჩევნო უბანზე ხმის მისაცემად.
19:00 საათისთვის „სამართლიანი არჩევნების“ დამკვირვებლების მიერ საუბნო საარჩევნო კომისიებში შეტანილი იყო 70 საჩივარი, ხოლო საოლქო საარჩევნო კომისიებში - 66 საჩივარი. 1 საჩივარი წარედგინა ცენტრალურ საარჩევნო კომისიას. 40 შენიშვნა დაფიქსირდა ჩანაწერთა წიგნში.
