28 ივლისს, ვაზიანის მე-11 პოლიგონზე ქართველი და ამერიკელი სამხედროები, იმიტირებულ ბრძოლაში დაუპირისპირდნენ ერთმანეთს. წვრთნა მრავალეროვანი სწავლების Agile Spirit 2021 წლის ფარგლებში გაიმართა. ნატოს 12 წევრისა (აშშ, დიდი ბრიტანეთი, პოლონეთი, რუმინეთი, თურქეთი, ლატვია, ესტონეთი, გერმანია, ესპანეთი, კანადა, იტალია და ლიეტუვა) და 3 პარტნიორი ქვეყნის (საქართველო, უკრაინა და აზერბაიჯანი) სამხედროები 26 ივლისიდან 6 აგვისტომდე შეეცდებიან ტაქტიკურ დონეზე ურთიერთთავსებადობა გააუმჯობესონ.
ქართველ და ამერიკელ სამხედროებს ერთმანეთისგან გორაკი ჰყოფდა. ორმხრივი სროლა დილის 10:30 საათზე დაიწყო. სცენარის მიხედვით, ქართულმა რაზმმა წინააღმდეგობს გაწევის შემდეგ საკვამლე კოჭები ისროლა და მწვანე კვამლის ფონზე უკან დახევა დაიწყო, რადგან მოწინააღმდეგე რაოდენობით მეტი აღმოჩნდა.
მრავალეროვანი სწავლების დასრულებამდე სამხედროები არაერთ სცენარს გაითამაშებენ, რომელშიც გამოიყენებენ სხვადასხვა სამხედრო ტექნიკასა და ბრძოლის ტაქტიკას.
ამ სწავლებაში პირველად გამოიყენეს "დელტას" მიერ წარმოებული „დიდგორი მედევაკის“ ჯავშანმანქანა. ჯავშანმანქანით, იმიტირებული ბრძოლის დროს დაჭრილი ამერიკელი სამხედრო საველე ჰოსპიტალში გადაიყვანეს.
ეს ერთგვარი სასწრაფო დახმარებაა ომში. სამედიცინო-საევაკუაციო ჯავშანმანქანა აღჭურვილია პირველადი სამედიცინო დახმარების საშუალებებით.
წვრთნის ბოლოს დაგეგმილი იყო საველე ჰოსპიტალის ტერიტორიიდან ვერტმფრენით ევაკუაციაც, თუმცა ძლიერი წვიმის გამო ეს მანევრი აღარ შესრულდა.
სამხედრო სწავლების ვაზიანის მიმართულების ხელმძღვანელის, პოლკოვნიკ რომან სანიკიძის თქმით ოპერაციამ ქართველი და ამერიკელი სამხედროების მონაწილეობით წარმატებით ჩაიარა.
„ეს სწავლება მნიშვნელოვანია იმიტომ, რომ ქართველი და ამერიკელი სამხედროები ხვეწენ უნარ-ჩვევებს, როგორც საველე ტაქტიკურ პირობებში, ასევე სხვადასხვა კომპონენტებში", - თქვა პოლკოვნიკმა სანიკიძემ სამხედრო ოპერაციის ბოლოს.
"ფართო სპექტრის სამედიცინო შესაძლებლობების" გამო მედივაკი ამერიკელმა სამხედროებმაც მოიწონეს.
მრავალეროვანი სწავლებას Agile Spirit 2021 ერთობლივად ატარებს საქართველოს თავდაცვის ძალების დასავლეთის სარდლობა და აშშ-ის არმიის სარდლობა ევროპასა და აფრიკაში.
თავდაცვის სამინისტროს ცნობითვე, წლევანდელი სწავლება ხუთ ადგილს ტარდება - სენაკის მე-2 ქვეითი ბრიგადის ტერიტორიაზე, სორტა/ეკის საწვრთნელ ბანაკში, ორფოლოს პოლიგონზე, ვაზიანის პოლიგონსა და ვაზიანის სამხედრო აეროდრომზე.
სცენარი მოიცავს სამეთაურო-საშტაბო და საველე სწავლებებს საბრძოლო სროლებითა და საჰაერო-სადესანტო ოპერაციებით.
