ორგანიზაციამ "რეპორტიორები უსაზღვრებოდ" (RSF) უნგრეთის პრემიერ-მინისტრი, ვიქტორ ორბანი შეიყვანა "პრესის თავისუფლების მტრების" თავის ყოველწლიურ სიაში. ეს არის პირველი შემთხვევა, როცა ევროკავშირის წევრი ქვეყნის მთავრობის ხელმძღვანელი მოხვდა ამ სიაში, რომელშიც, სხვებთან ერთად, ასევე შედიან ჩრდილოეთ კორეის ლიდერი, კიმ ჩენ ინი და სირიის პრეზიდენტი, ბაშარ ალ-ასადი.
ორგანიზაცია 5 ივლისს აცხადებს, რომ ორბანმა და მისმა პარტიამ, ფიდესმა, "უნგრეთის მედიასივრცე ნაბიჯ-ნაბიჯ მოაქციეს კონტროლის ქვეშ", 2010 წელს ხელისუფლებაში მოსვლის შემდეგ. "რეპორტიორები უსაზღვრებოდ" ამბობს, რომ ორბანი მედიასაშუალებებს "მტაცებლური მეთოდებით" იღებს მიზანში, რაც მოიცავს "ყალბ პოლიტიკურ და სქემებს, დისკრედიტაციას და თვითცენზურას". ორგანიზაცია აღნიშნავს, რომ 2017 წლის ზაფხულიდან უნგრეთში რეგიონულ პრესას სრულად აკონტროლებენ ორბანთან ახლო კავშირების მქონე ბიზნესები.
"პრესის თავისუფლების მტრების" სია მოიცავს სახელმწიფოების და მთავრობების 37 მეთაურს, რომლებიც თავაშვებულად ავიწროებენ მედიას. მათ შორის არიან ირანის უზენაესი ლიდერი, აიათოლა ალი ხამენეი, რუსეთის პრეზიდენტი, ვლადიმირ პუტინი, ბელარუსის ავტორიტარი ლიდერი, ალიაქსანდრ ლუკაშენკა, ჩეჩნეთის ლიდერი, რამზან კადიროვი, და შუა აზიის ქვეყნების ლიდერები - ტაჯიკეთის ემომალი რაჰმონი და თურქმენეთის გურბანგული ბერდიმუხამედოვი.
