პარტია "საქართველოსთვის" თავმჯდომარე და ყოფილი პრემიერი, გიორგი გახარია ამბობს, რომ თანამდებობის დატოვების შემდეგ თავს კომფორტულად გრძნობს. მან ტელეჟურნალისტებთან შეხვედრის დროს ეს ასე ახსნა:
"გამოვედი ამ როლიდან და მინდა, გითხრათ, რომ უაღრესად კომფორტულად ვგრძნობ თავს - თავისუფლების მაღალი ხარისხით, უფრო პერსონალიზირებული და უფრო ფოკუსირებული პასუხისმგებლობის გრძნობით და კიდევ ბევრი სხვა დამატებითი პლუსი ამ ყველაფერში. თუმცა, რა თქმა უნდა, ეს შესაძლებლობები, რასაც გაძლევს იყო ქვეყნის პრემიერ-მინისტრი, არის მნიშვნელოვანი, განსაკუთრებით მაშინ, როცა გაქვს სურვილი, ეს შესაძლებლობები გამოიყენო მაქსიმალურად ეფექტურად, რაც ხან გამოგვდიოდა, ხან - არა".
გახარიამ პარტია ორი დღის წინ, 29 მაისს დააფუძნა და სწორედ ამ დღეს გამოჩნდა მედიის წინაშე პირველად გადადგომის შემდეგ. მან თანამდებობა 18 თებერვალს დატოვა, როცა "ნაციონალური მოძრაობის" თავმჯდომარის, ნიკა მელიას დასაკავებლად პოლიციას სპეცოპერაცია უნდა დაეწყო. მისი თქმით, ამ საკითხზე პარტიაში მისგან განსხვავებული მოსაზრებები იყო და ამ მიზეზით დატოვა თანამდებობა.