აშშ-ის სენატის რესპუბლიკელმა წევრებმა დაბლოკეს 2021 წლის 6 იანვარს კაპიტოლიუმის შენობაზე ყოფილი პრეზიდენტის, დონალდ ტრამპის, მომხრეთა მიერ განხორციელებული შტურმის თაობაზე საგამოძიებო ორპარტიული კომისიის შექმნის იდეა.
სააგენტო „როიტერსის“ ცნობით, დადგენილების პროექტს მხარი დაუჭირა 54-მა სენატორმა, მათ შორის 6-მა რესპუბლიკელმა, მაგრამ 35 რესპუბლიკელი სენატორი წინააღმდეგი იყო.
საგამოძიებო ორპარტიული კომისიის შექმნის ინიციატივას 19 მაისს მხარი დაუჭირა კონგრესის წარმომადგენელთა პალატამ, მაგრამ პროექტის საბოლოო დამტკიცებას სჭირდებოდა 60 სენატორის ხმა.
რესპუბლიკელი სენატორების მიერ ორპარტიული საგამოძიებო კომისიის შექმნის საკითხის ჩაგდება გააკრიტიკეს სენატის რესპუბლიკელთა უმრავლესობის ლიდერმა, ჩაკ შუმერმა და ქვედა პალატის სპიკერმა, ნენსი პელოსიმ, რომლის თქმითაც, რესპუბლიკელებმა საკუთარი ინტერესები „კონგრესისა და ქვეყნის უსაფრთხოების“ ინტერესზე უფრო მაღლა დააყენეს.
სენატის რესპუბლიკელთა ლიდერმა, მიჩ მაკკონელმა, საგამოძიებო კომისიის შექმნის იდეას უწოდა პირწმინდად „პოლიტიკური აქტი“ და მოუწოდა კოლეგებს, რომ შეეშვან წარსულში მომხდარ მოვლენებზე ყურადღების გადატანას.
2021 წლის 6 იანვარს, პრეზიდენტ დონალდ ტრამპის მხარდამჭერები კაპიტოლიუმის შენობაში შეიჭრნენ და მოითხოვდნენ, რომ კონგრესს არ ეღიარებინა 2020 წლის 3 ნოემბრის არჩევნებში ჯო ბაიდენის გამარჯვება. მასობრივი არეულობების შედეგად 5 ადამიანი დაიღუპა.
