სამხედრო აღლუმისთვის ემზადებიან ოკუპირებულ ცხინვალში. რეპეტიციების დროს ქალაქის ცენტრალური ნაწილი იკეტება. მეორე დღეა ქალაქის ცენტრალურ ნაწილთან გადაადგილება შეზღუდულია. თეატრალურ მოედანზე 9 მაისისადმი მიძღვნილი სამხედრო აღლუმის რეპეტიციები მიმდინარეობს. მასში მონაწილეობენ, როგორც დე ფაქტო რესპუბლიკის შეიარაღებული ძალების პირადი შემადგენლობა, ისე რუსეთის მეოთხე სამხედრო ბაზის ჯარისკაცები. აღლუმის გენერალური რეპეტიცია 7 მაისს გაიმართება.
ცენტრალურ მოედანზე სამხედრო ბაზებზე არსებულ სამხედრო ტექნიკასაც გამოიყვანენ. 9 მაისს სამხედრო აღლუმს დე ფაქტო რესპუბლიკის თავდაცვის მინისტრი იბრაგიმ გასიევი ჩაიბარებს. აღლუმს უხელმძღვანელებს დე ფაქტო თავდაცვის მინისტრის მოადგილე, ე.წ გენერალური შტაბის ხელმძღვანელი, რუსეთიდან ცხინვალში ჩასული გენერალ-მაიორი ვიქტორ ფედოროვი.
ოსური მედიის ცნობით, სამხედრო აღლუმში მონაწილეობას 750-ზე მეტი სამხედრო მოსამსახურე და 50 ერთეული სამხედრო ტექნიკა მიიღებს.
ცხინვალის რეგიონში განთავსებულ რუსეთის საოკუპაციო მეოთხე ბაზაზე პირადი შემადგენლობის ვაქცინაცია დაჩქარებული წესით ჩატარდა. ადგილზე რუსეთში წარმოებული კორონავირუსის საწინააღმდეგო ვაქცინა „სპუტნიკ - V“ ჩაიტანეს. მოგვიანებით იმავე ვაქცინით ცხინვალის ჯანდაცვის სისტემის თანამშრომლების აცრაც დაიწყეს.
