„ლელო"-ს ლიდერებმა ბრიუსელში შეხვედრები გამართეს
პარტიის პრესსამსახურის ინფორმაციით, მათ პირველი შეხვედრა გამართეს ევროპარლამენტარ სვენ მიკსერთან. ევროპარლამენტის საგარეო კომიტეტის წევრთან „ლელოს“ ლიდერებმა ილაპარაკეს საქართველოში არსებულ პოლიტიკურ ვითარებაზე, ევროპული საბჭოს პრეზიდენტის შარლ მიშელის 5-პუნქტიან გეგმაზე და მისი აღსრულების მონიტორინგზე.
„გვქონდა შეხვედრა ბატონ სვენ მიკსერთან, ევროპარლამენტის წევრთან, რომელიც არის მთავარი მომხსენებელი საქართველოზე. ყოველთვიურად ის ამზადებს საქართველოზე ანგარიშს. ის არის ძალიან ინფორმირებული მიმდინარე პროცესებზე ჩვენს ქვეყანაში. ძალიან დიდ მხარდაჭერას უცხადებს იმ შეთანხმებას რომელიც ცნობილია როგორც შარლმ მიშელის მიერ მომზადებული დოკუმენტი, რომელსაც ხელი მოვაწერეთ. აუცილებელია ამ დოკუმენტის განხორციელების პროცესში ჩართული იყოს ევროპარლამენტის წევრები იმისათვის, რომ სრულად განხორციელდეს ყველა ის პუნქტი და რეფორმა რომელიც გათვალისწინებულია ამ დოკუმენტით.
ვისაუბრეთ, რომ ძალიან სწრაფად უნდა გადაწყდეს პოლიტპატიმრების განთავისუფლების საკითხი. რაც შეიძლება მალე უნდა მოიძებნოს მექანიზმი, რომელიც იქნება მისაღები. რა თქმა უნდა ამნისტიის კანონზეც გვქონდა საუბარი, რომელიც არის საბოლოო ჯამში ამ პრობლემის გადაჭრის მექანიზმი, მაგრამ ახლა დაუყოვნებლივ განთავისუფლების მექანიზმი და აქ შეიძლება ევროპარლამენტმა თავისი როლი ითამაშოს რომელიც გადაწყვეტს ამ პრობლემას და მელია განთავისუფლდება უახლოეს პერიოდში", - თქვა ბადრი ჯააფარიძემ.
ისინი დღესვე შეხვდნენ ევროპარლამენტარ ანდრიუს კუბილიუსთნ და სხვა დეპუტატებს.
„ჩვენ გვქონდა ძალიან საინტერესო შეხვედრა. ორი მიმართულებით ვისაუბრეთ. ეს არის ჩვენი ქვეყნის მომზადება რაც შეიძლება სწრაფად ევროკავშირში გაწევრიანებისთვის. საქართველოს სჭირდება მაპი ევროკავშირში შესასვლელად და საკმაოდ საინტერესო წინადადებებია ამასთან დაკავშირებით. მხოლოდ განცხადება, რომ ჩვენ 2024-ში ჩვენ ევროკავშირში შესვლა გვინდა, ეს არაფერს არ ნიშნავს თუ დღესვე არ დავიწყეთ საკმაოდ სწრაფი მოქმედება და რეალური ნაბიჯები არ გადავდგით", - თქვა მამუკა ხაზარაძემ.
„ლელო"-ს ლიდერებმა შეხვედრებზე აგრეთვე ილაპარაკეს ადგილობრივ არჩევნებზე, რომელიც გაიმართება ოქტომბერში.