რა შეზღუდვები იხსნება და რა რჩება 24 დეკემბრიდან?
საკოორდინაციო საბჭომ 22 დეკემბერს მიიღო საბოლოო გადაწყვეტილება იმის შესახებ, რომ 24 დეკემბრის დილის 7 საათიდან საქართველოში არსებული სავაჭრო ობიექტები მუშაობას განაახლებენ. ისინი საღამოს 7 საათამდე იმუშავებენ.
ობიექტებს ევალებათ იზრუნონ იმაზე, რომ მათ სივრცეში ხალხმრავლობა არ იყოს. თუ თქვენ ტანსაცმლის ყიდავას აპირებთ, მათ მოზომვას ვერ შეძლებთ, რადგან გასახდელები იხურება. სავაჭრო ცენტრებში მაღაზიები კი გაიხსნება, თუმცა დახურული იქნება ყველა კვების ობიექტი, მატ შორის ისინი ვინც აქამდე გატანის სერვისზე მუშაობდნენ.
მუშაობას ვერ განაახლებენ ბაზრობები. ასევე არ აღდგება საზოგადოებრივი ტრანსპორტის მოძრაობა. კვების ობიექტები (სავაჭრო ცენტრებს გარეთ) ისევ მხოლოდ გატანის სერვისს შესთავაზებენ კლიენტებს.
24 დეკემბრიდან კიდევ ერთი აკრძალვა შედის ძალაში. სასტუმროებს, რომლებსაც დამსვენებლები ჰყავდათ, ეკრძალებათ 21:00 საათის შემდეგ რესტორნის სივრცის ამუშავება. ამ დროიდან დაშვებული იქნება მხოლოდ ნომერში მომსახურების სერვისი.
ვრცლად წაიკითხე აქ.
თბილისის მერიამ სამგორის რაიონში 7 ნაგებობა დაანგრია
თბილისის მერიის მუნიციპალურმა ინსპექციამ სამგორის რაიონში, თვალჭრელიძის ქუჩაზე დაანგრია 7 ნაგებობა, რომელიც მერიის ინფორმაციით, უკანონოდ აშენდა.
5 მათგანი დაუსრულებელი იყო, 2 კი თითქმის დასრულებული. ეს ორი ნაგებობა აფხაზეთიდან დევნილმა და-ძმამ ააშენა. ძმას, ლევან ფიფიას ჰყავს ცოლი და 3 შვილი, რომლებიც დემონტაჟის დროს სხვაგან იმყოფებოდნენ.
გუშინ დედაქალაქის მთავრობის სხდომის დაწყებამდე გამართულ ბრიფინგზე თბილისის მერი კახა კალაძე გამოეხმაურა თვალჭრელიძის ქუჩაზე შენობების დემონტაჟს. მან ჩამოთვალა 5 ადამიანის და მათი ოჯახის წევრების ქონება და აღნიშნა, რომ ის მოქალაქეები, ვისაც მართლა არ აქვთ არანაირი საცხოვრებელი, გამგეობები მზად არიან უზრუნველყონ ბინის ქირით.
ეს პირველი შემთხვევა არ არის, როცა თბილისის მერი საუბრობს მოქალაქეების სხვა ქონებაზე. ასე მოიქცა კახა კალაძე აფრიკის დასახლებაში მდებარე შენობების დემონტაჟის შემდეგაც.
ადამიანის უფლებებზე მომუშავე ორგანიზაციები რადიო თავისუფლებასთან საუბარში აღნიშნავენ, რომ ამგვარი ინფორმაცია არა ნაგებობების დანგრევის შემდეგ, არამედ მანამდე უნდა არსებობდეს და რომ რეგიონებში არსებული მიწის ნაკვეთი ან ოჯახის წევრზე გაფორმებული სახლი არ ნიშნავს იმას, რომ კონკრეტულ ადამიანს იქ ცხოვრება და თავის რჩენა შეუძლია.
წაიკითხე მეტი.
დღეს პარლამენტი მინისტრთა კაბინეტს უყრის კენჭს
პარლამენტი ახალ მთავრობას დღეს დაამტკიცებს. ნდობის მისაღებად მინისტრთა კაბინეტს 76 დეპუტატის ხმა სჭირდება. კაბინეტი და მათი პროგრამა 18 დეკემბერს წარადგინეს, რასაც მოჰყვა კომიტეტებში განხილვები. გუშინ კი პარლამენტის ერთადერთმა ფრაქციამ, „ქართულმა ოცნებამ" პრემიერ-მინისტრობის კანდიდატსა და მინისტრობის კანდიდატებს მოუსმინა.
პრემიერობის კანდიდატმა, გიორგი გახარიამ გუშინ თქვა, რომ დემოკრატიზაციის მიღწევაა, როცა არჩევნების შედეგად 9 ოპოზიციური პარტია 60 მანდატით ხვდება პარლამენტში. მან ასევე დაამატა, რომ გამოწვევების გათვალისწინებით პარლამენტში ოპოზიციის გარეშე მუშაობა რთული იქნება.
წაიკითხე მეტი.
სხვა სიახლეები საკანონმდებლო ორგანოდან:
პირველი მოსმენით მიიღეს კანონპროექტი, რომლითაც პარტიას მანდატებზე უარის გამო დაფინანსება შეუწყდება
კობახიძის თქმით, 2008-ში პარტიების დაფინანსების შეწყვეტა მათი დასჯა იყო, ახლა - წახალისებაა
პარტიებს მანდატების გაუქმებამდე დაფინანსება არ შეუწყდებათ - ანრი ოხანაშვილი
თურქეთის ელჩი საგარეო უწყებაში იმყოფებოდა აფხაზეთში მოქმედი საბანკო ბარათების საკითხზე
ოკუპირებულ აფხაზეთში მოქმედი საბანკო ბარათების საკითხი განიხილეს საგარეო საქმეთა სამინისტროში, საქართველოში თურქეთის ელჩთან ფატმა ჯერენ იაზგანთან შეხვედრაზე. „პირველი არხის" ინფორმაციით, ელჩმა თქვა, რომ თურქეთის მთავრობა, თურქეთის სახელმწიფო აღიარებს საქართველოს სუვერენიტეტს, ტერიტორიულ მთლიანობას და ვერასდროს იქნებოდა შეთანხმება ოკუპირებული ტერიტორიებისთვის ფინანსური სერვისების მიწოდებაზე.
საქმე ეხება ოკუპირებული აფხაზეთის დე ფაქტო ეროვნული ბანკის განცხადებას იმის შესახებ, რომ აფხაზური პლასტიკური ბარათების მომსახურების გეოგრაფიული არეალი იზრდება. „ორმა მსხვილმა თურქულმა ბანკმა IS BANK-მა და ZIRAAT BANK-მა აფხაზური ეროვნული საბანკო პლასტიკური ბარათების - APRA WORLD-ის მომსახურება დაიწყეს".
საქართველოს საგარეო საქმეთა სამინისტროს განმარტებით, სინამდვილეში, ბარათი „აფრა” სხვა არაფერია, თუ არა რუსული საგადასახადო ბარათი МИР, რომელსაც საოკუპაციო რეჟიმის მიერ აფხაზეთის რეგიონში სახელწოდება „აფრა” აქვს მინიჭებული და აფხაზურ ბარათადაა წარმოჩენილი.
წაიკითხე მეტი.
გერმანიის საავადმყოფო საბოლოო დასკვნაში ამბობს, რომ ნავალნი "ნოვიჩოკის" ტიპის ნივთიერებით მოწამლეს
გერმანიის საავადმყოფომ, სადაც ალექსეი ნავალნი გადიოდა მკურნალობის კურსს, რუსი დისიდენტის მწვავე დაავადების შესახებ გამოაქვეყნა საბოლოო დასკვნა, რომელშიც წერია, რომ ის "ნოვიჩოკის" ტიპის ნერვული ნივთიერებით იყო მოწამლული.
ნავალნი მძიმედ ავად გახდა რუსეთის შიდა ავიარეისზე, 20 აგვისტოს და პირველ ეტაპზე მას ორი დღის განმავლობაში ციმბირის ქალაქ ომსკის საავადმყოფოში მკურნალობდნენ, შემდეგ გერმანიაში გაამგზავრეს.
სამედიცინო ჟურნალ "ლანცეტში" 23 დეკემბერს გამოქვეყნებულ წერილში ბერლინის შარიტეს კლინიკის ექიმები დეტალურად აღწერენ სიმპტომებს, რომლებიც ნავალნის მათ კლინიკაში მოხვედრისას აღენიშნებოდა. "გერმანიის შეიარაღებული ძალების ლაბორატორიამ, რომელის ქიმიური იარაღის აკრძალვის ორგანიზაციის ეგიდით მუშაობდა, შარიტეში პაციენტის მოხვედრისთანავე აღებული სისხლის სინჯში დაადგინეს ორგანული ფოსფორის ნერვული აგენტი "ნოვიჩოკის" ჯგუფიდან" - ვკითხულობთ დასკვნაში.
წაიკითხე მეტი.
რომელი "კავკასიური პლატფორმა" ? - რას გულისხმობდა პრეზიდენტი მორიგ სადავო განცხადებაში
საერთაშორისო პარტნიორები სახიფათოდ მიიჩნევენ საქართველოს პრეზიდენტის, სალომე ზურაბიშვილის ინიციატივას „კავკასიური პლატფორმის“ შესახებ. ისინი რისკებს უკავშირებენ რეგიონში რუსეთის პოზიციების გაძლიერებას, განსაკუთრებით მთიანი ყარაბაღის კონფლიქტის მწვავე ფაზის შეჩერების შემდეგ. სალომე ზურაბიშვილის განცხადებები დროში ემთხვევა აზერბაიჯანისა და თურქეთის პრეზიდენტების ინიციატივას - რეგიონში ახალი პლატფორმის შექმნის შესახებ, 6 ქვეყნის და მათ შორის - საქართველოსა და რუსეთის მონაწილეობით.
21 დეკემბერს ტვიტერით გავრცელებულ ვიდეოჩანაწერში საქართველოს პრეზიდენტი იმედს გამოთქვამს, რომ 2021 წელი იქნება „ჩვენი გაცოცხლების წელი“ და საქართველო „კავკასიური პლატფორმის ინიციატივის მიმართ ვერ იქნება ვერც პასიური და ვერც მეორე ხარისხოვანი“.
რას გულისხმობს პრეზიდენტი და რატომ იქცა მისი განცხადება მწვავე დისკუსიის საგნად? წაიკითხე ვრცლად ლელა კუნჭულიას სტატიაში.
ფოთის შუქურა პირველად 1864 წელს აანთეს და მას მერე არასოდეს ჩამქრალა - ის 1862 წელს, ბრიტანული კომპანია „Easton Amos and sons“-ის ინჟინრებმა ლონდონში დაამზადეს. თუჯის ფირფიტები სულ დანომრილი ჩამოუტანიათ და ქანჩებით და ჭანჭიკებით, შედუღების გარეშე აუწყვიათ. როგორც ამბობენ, შუქურას ადგილი თავად ინგლისელებს შეურჩევიათ - შავი ზღვის და მდინარე რიონის შესართავთან. კობა კოკაია უკვე თვრამეტი წელია ამ შუქურას მეთვალყურეა. მოგვითხრობს, რომ რკინის სპირალურ კიბეს, რომელიც შუქურის წვერომდე ადის, 160 საფეხური აქვს. მისი სიმაღლე 40 მეტრამდე აღწევს. ნათების სიშორე კი 16 საზღვაო მილია - ანუ დაახლოებით 30 კილომეტრი. ადრე მის სანათს შვედური ფითილიანი ნავთქურით ანათებდნენ. საწვავად ხან ნახშირს, ხან ნავთს იყენებდნენ. ფოთში თავიანთ შუქურაზე არაერთ ლეგენდას ყვებიან. საქართველოში ფეხბურთი პირველად შუქურას ამგებმა ინჟინრებმა ითამაშესო. თამაშში შუქურას მიმდებარედ მცხოვრები მოსახლეობაც ერთვებოდა და ფეხბურთის თამაშის ტრადიციაც საქართველოში იქედან იღებს სათავესო. იმასაც ამბობენ, მეორე მსოფლიო ომის დროს, შუქურა ფაშისტების წყალქვეშა ნავიდან დამიზნებულ ტყვიებსაც გადაურჩაო მისი მეთვალყურის ძალისხმევითო. ტექნოლოგიური განვითარების მიუხედავად, ფოთის შუქურა დღემდე რჩება პორტში შემომსვლელი გემების ორიენტირად, თუმცა დღეს ის უფრო ფოთის სიმბოლოდაა ქცეული.
