აშშ-მა სანქციები დაუწესა ბელარუსის საპოლიციო დანაყოფებს და უსაფრთხოების სფეროს მაღალჩინოსანს, მათი როლის გამო ძალადობრივ რეპრესიებში, რომლებსაც ატარებენ ქვეყნის ავტორიტარი ლიდერის, ალექსანდრ ლუკაშენკას წინააღმდეგ მიმდინარე მასობრივი აქციების მონაწილეების მიმართ.
აშშ-ის სახელმწიფო მდივანმა, მაიკ პომპეომ 23 დეკემბერს დაგმო მიმდინარე "ძალისხმევა, რომელიც ძირს უთხრის ბელარუსულ დემოკრატიას". "ჩვენ ბელარუსის გაბედული ხალხის გვერდით ვართ და მხარს ვუჭერთ მათ უფლებას ჰქონდეთ თავისუფალი და სამართლიანი არჩევნები" - თქვა პომპეომ.
სანქციების გამოცხადებისას, 23 დეკემბერს ფინანსთა სამინისტრომ თქვა, რომ აშშ-ში განთავსებულ ნებისმიერ ქონებას გაუყინავს და ფინანსურ ოპერაციებს აუკრძალავს ბელარუსის შინაგან საქმეთა მინისტრის პირველ მოადგილეს, გენადი კაზაკევიჩს. ოქტომბერში კაზაკევიჩი ვიდეომიმართვით გამოვიდა და განაცხადა, რომ ლეტალურ იარაღს გამოიყენებდნენ დემონსტრანტთა წინააღმდეგ. დემონსტრაციები იმართება აგვისტოში ჩატარებული საპრეზიდენტო არჩევნების შედეგის გასაპროტესტებლად, რომელმაც გამარჯვება კიდევ ერთხელ, მეექვსე ვადით მიაკუთვნა ალექსანდრ ლუკაშენკას. დემონსტრანტები შედეგს უარყოფენ და არჩევნებს მიიჩნევენ გაყალბებულად ლუკაშენკას სასარგებლოდ.
ფინანსთა სამინისტრომ 23 დეკემბერს სანქციები დააკისრა ასევე უსაფრთხოების სამ უწყებას, რომლებიც რეპრესიებში მონაწილეობდნენ. ისინი მოიცავს მინსკის საგანგებო სიტუაციათა პოლიციის დანაყოფს (OMON), მინსკის საქალაქო აღმასრულებელი კომიტეტის შინაგან საქმეთა უწყების გენერალურ დირექტორატს და მინსკში განთავსებულ კაგებეს დანაყოფს, "ალფას".
