"ქართული ოცნება" ამნისტიისთვის ემზადება. შესაბამისი კანონპროექტი მმართველმა პარტიამ უკვე მოამზადა და პარლამენტში დაარეგისტრირებს.
კანონპროექტით გათვალისწინებულია სასჯელისგან იმ პირთა განთავისუფლება, რომლებმაც დანაშაული 2020 წლის 11 დეკემბრამდე ჩაიდინეს. ადამიანის უფლებათა კომიტეტის თავმჯდომარემ, მიხეილ სარჯველაძემ განაცხადა, რომ არ გათავისუფლდება ის დამნაშავე, რომელიც მკვლელობისთვის ან ოჯახში ძალადობისთვის იხდის სასჯელს.
ამნისტია გათვალისწინებულია:
იმ დანაშაულების შემთხვევაში, რომელიც მითითებულია კანონპროექტში და, რომელიც დაკავშირებულია დაზარალებულისთვის ქონებრივი ზიანის მიყენებასთან, ასეთ შემთხვევაში სასჯელისგან განთავისუფლებისთვის სავალდებულო წინაპირობა იქნება ზიანის ანაზღაურება, ხოლო ცალკეულ შემთხვევებში - დაზარალებულის თანხმობა;
ცალკეულ შემთხვევებში გათვალისწინებულია წინაპირობად ასევე ნასამართლობის არქონა;
გათვალისწინებულია აგრეთვე ხანდაზმული, 2012 წლის 1 ოქტომბრამდე შეფარდებული სისხლის სამართლის ჯარიმისგან პირთა განთავისუფლება.
"წარმოდგენილი კანონპროექტი, ზემოაღნიშნული მიდგომების მიხედვით მოიცავს საკმაოდ დიდ ჩამონათვალს დანაშაულებისა, რომელიც დაექვემდებარება ამნისტიას. ეს არის ქურდობა, ფალსიფიკაცია, ქონების დაზიანება, სხეულის დაზიანების ზოგიერთი კატეგორია და ა.შ. ამნისტია შეეხება სულ 44 მუხლით გათვალისწინებულ დანაშაულს... დღევანდელი მდგომარეობით, ჩვენი ინიციატივა მოიცავს ასევე ნარკოდანაშაულებს, გარდა გასაღების დანაშაულისა", - განაცხადა ადამიანის უფლებათა კომიტეტის თავმჯდომარემ, მიხეილ სარჯველაძემ.
მანვე აღნიშნა, რომ მმართველი პარტია მზად არის, ამ საქმეზე დაინტერესებული მხარეებისგან განსხვავებული აზრები მოისმინოს.
სარჯველაძემ აღნიშნა, რომ კანონპროექტში იმ პირთა ინტერესებიც იქნება გათვალისწინებული, რომლებსაც უვადო პატიმრობა აქვთ მისჯილი და 15-დან 25 წლამდე მსჯავრი უკვე მოიხადეს:
"მათთვის შეიქმნება თავისუფლებისათვის მომზადების სპეციალური პროგრამა, რაც კანონით დადგენილ ვადაში, მოსამართლეს ინფორმირებული და სამართლიანი გადაწყვეტილების მიღების საშუალებას მისცემს. ასეთი მიდგომა ხელს შეუწყობს უვადო თავისუფლებააღკვეთილი პირებისთვის რეაბილიტაციისა და რესოციალიზაციის პერსპექტივების შექმნას, და ასევე ეს წარმოადგენს ევროპულ სტანდარტს უვადო თავისუფლებააღკვეთილი პირების უფლებების დაცვის კუთხით. რასაკვირველია, ამ დროს მნიშვნელოვანი იქნება დაზარალებული მხარის უფლებებიც".
