ქაბულში მომხდარ თავდასხმებზე პასუხისმგებლობა იკისრა "ისლამურმა სახელმწიფომ"
ძალადობა მოხდა რამდენიმე საათით ადრე, სანამ აშშ-ის სახელმწიფო მდივანი, მაიკ პომპეო ყატარში უნდა შეხვედროდა თალიბანის და ავღანეთის მთავრობის მომლაპარაკებელთა გუნდებს, იმ მიზნით, რომ განახლებულიყო შეჩერებული სამშვიდობო მოლაპარაკება.
თავდასხმები ასევე ორი დღით უსწრებს წინ დონორთა მნიშვნელოვან კონფერენციას ავღანეთის საკითხზე, რომელიც ჟენევაშია დანიშნული.
ავღანეთის შინაგან საქმეთა სამინისტროს პრესმდივანი, ტარიყ არიანი ვიდეომიმართვაში ამბობს, რომ "თალიბანმა 24 რაკეტა ისროლა" ქაბულის ხუთ სხვადასხვა უბანში, მათ შორის უბანში, რომელიც ახლოს მდებარეობს დიპლომატიურ ანკლავთან, სადაც სხვადასხვა საელჩოა განთავსებული. არიანის თქმით, სარაკეტო თავდასხმები წარმოადგენს "თალიბანის მხრიდან მარცხის მკაფიო ნიშანს". პრესმდივანი დასძენს, რომ ამ სისხლიან აქტს შურისძიება მოჰყვება.
თალიბანი უარყოფს თავდასხმაში მონაწილეობას.
მოგვიანებით, თავდასხმებზე პასუხისმგებლობა იკისრა ექსტრემისტულმა დაჯგუფებამ, "ისლამურმა სახელმწიფომ".
დოჰაში პომპეო ცალ-ცალკე შეხვდა ავღანეთის მთავრობის და თალიბანის მომლაპარაკებლებს. მისი თქმით, მას აინტერესებს ის, თუ "როგორ შეიძლება გაიზარდოს წარმატებული შედეგის მიღწევის ალბათობა". პომპეომ მთავრობის გუნდს ასევე უთხრა, რომ აშშ კვლავ "გვერდით იჯდება და სადაც შეეძლება, იქ გასწევს დახმარებას" სამშვიდობო მოლაპარაკებებში.