როცა 23 აგვისტოს ბელარუსის შეჭირვებული პრეზიდენტი ალიაქსანდრ ლუკაშენკა თავისი ვერტმფრენიდან გადმოვიდა საბრძოლო შაშხანით ხელში, ამ სცენაზე ზოგს შეიძლება დეჟა ვუს განცდა ჰქონდა. ეს იმავე მოდელის შაშხანა იყო, რომლით ხელშიც ხშირად გვინახავს ფოტოსურათებზე „ალ-ყაიდის“ ლიდერი ოსამა ბინ ლადენი. ეს იყო ასევე „ისლამური სახელმწიფოს“ ლიდერის, აბუ ბაქრ ალ-ბაღდადის საყვარელი იარაღი.
იარაღი, რომელიც უჭირავს ლუკაშენკას, არის საბჭოთა წარმოების AKS-74U, რომელიც მთელ მსოფლიოში გავრცელებული საბრძოლო ავტომატის, AK-74-ის უფრო მსუბუქი და მოკლე ვარიანტია. სპეციალიზებული AKS-74U 1979 წელს შეიქმნა და ის მოკლე ლულის გამო სიმძლავრით და სიზუსტით ჩამოუვარდება AK-74-ს.
AKS-74U-ს დასახელებაში "S" რუსულად აღნიშნავს „სკლადნოის“ (დასაკეცი), ხოლო "U" – „უკოროჩენნის“ (დამოკლებული), რაც მისი დიზაინის მთავარ თავისებურებებზე მიანიშნებს. AKS-74U დაახლოებით ორჯერ უფრო მოკლეა, ვიდრე AK-74 და ის შეიქმნა, როგორც პირადი თავდაცვის იარაღი, განსაკუთრებით - ჯავშანმანქანების ეკიპაჟისთვის, რომელსაც ესაჭიროება პისტოლეტზე უფრო მძლავრი, მაგრამ ამავე დროს საკმარისად მოკლე იარაღი, რომლის მანევრირება იოლად შეიძლება ტანკში ან ჯავშანტრანსპორტიორში.
როგორც ფიქრობენ, ბინ ლადენს AKS-74U ამ იარაღის სიმბოლური მნიშვნელობის გამო უფრო მოსწონდა. 1979-89 წლებში საბჭოთა ჯარების მიერ ავღანეთის ოკუპაციის დროს ჯიჰადისტ მეამბოხეებს არ ჰქონდათ ამ სუპერთანამედროვე იარაღის ყიდვის შესაძლებლობა. ამიტომ მისი ფლობა ერთგვარ „სკალპად“ მიიჩნეოდა და საბჭოთა ჯარისკაცზე გამარჯვებას მიანიშნებდა. ტერორისტთა ლიდერებისთვის, რომლებსაც მალვა უწევდათ, მაგალითად, ბინ ლადენის ან ბაღდადისთვის, ამ იარაღს აშკარად ჰქონდა პრაქტიკული უპირატესობა უფრო გრძელ ვარიანტებთან შედარებით, ვინაიდან მისი დამალვა იოლი იყო.
მაგრამ აქ, გაშლილ სივრცეში, რატომ შეარჩია ლუკაშენკამ სწორედ ეს, ათწლეულების წინანდელი იარაღი, რომელიც არც სიზუსტით გამოირჩევა და არც სიმძლავრით, მაშინ, როცა მის ხელთ არის თანამედროვე შეიარაღების მთელი არსენალი? პასუხი ალბათ ლუკაშენკას სამხედრო წარსულში უნდა ვეძებოთ. 1980-იანი წლების დასაწყისში ლუკაშენკა საბჭოთა მოტორიზებულ ქვეითთა ასეულის მეთაურის მოადგილ იყო და სავარაუდოდ AKS-74U-ს იყენებდა. შესაძლებელია, რომ ბელარუსის პრეზიდენტის საყვარელი იარაღი საბჭოთა პერიოდიდან გამოყოლილი რელიკვიაა.
