ლატვიის, ლიეტუვისა და ესტონეთის პრემიერ-მინისტრებმა ერთობლივი განცხადება გაავრცელეს და ბელარუსის ხელისუფლებას მოუწოდეს, ჩაატაროს ახალი, თავისუფალი და სამართლიანი არჩევნები და შეწყვიტოს ძალადობა 9 აგვისტოს არჩევნების შემდეგ.
სამი სახელმწიფოს ერთობლივ განცხადებაში გამოთქმულია მოწოდება მინსკის მიმართ, გაათავისუფლოს ყველა პოლიტიკური პატიმარი და აქციების დროს დაკავებული ადამიანები. ლატვიის, ლიეტუვასა და ესტონეთის პრემიერ-მინისტრები ღრმა შეშფოთებას გამოხატავენ ოპოზიციის მიმართ ბელარუსის ხელისუფლების ქმედების და პოლიტიკური რეპრესიების გამო.
9 აგვისტოს არჩევნებში, ოფიციალური შედეგებით, გაიმარჯვა ბელარუსის პრეზიდენტმა, ალიაქსანდრ ლუკაშენკამ. არჩევნების შემდეგ არ წყდება საპროტესტო გამოსვლები.
ბალტიის სახელმწიფოთა მთავრობების მეთაურები თვლიან, რომ ბელარუსში ხელახალ არჩევნებს საერთაშორისო მეთვალყურეები უნდა დაესწრონ.
ერთობლივი განცხადება გაფორმდა ესტონეთის ქალაქ ტარტუში მათი შეხვედრის დროს. პრემიერებმა მოუწოდეს ევროპის კავშირს, დაუწესოს სანქციები იმ პირებს, ვინც პასუხისმგებელია დემონსტრანტების მიმართ ძალადობისთვის.
ბელარუსის ოპოზიციის ლიდერმა სვიატლანა ციხანოუსკაიამ მომხრეებს 15 და 16 აგვისტოს მშვიდობიანი გამოსვლებისკენ მოუწოდა, მას მერე, რაც აიძულეს, ქვეყანა დაეტოვებინა და ლიეტუვაში წასულიყო.
