ბათუმის ერთ-ერთ საკარანტინო სივრცეში დღეს მე-4 სართულიდან 26 წლის კაცი გადახტა. იზოლაციის პირობებში მომხდარი ინციდენტის შესახებ შინაგან საქმეთა სამინისტრო იტყობინება.
კაცი, რომელიც კარანტინში მოთავსებიდან რამდენიმე საათში გადახტა, ისევ უგონოდაა. იგი ბათუმის ერთ-ერთ სამედიცინო დაწესებულებაში რჩება.
"მდგომარეობა მძიმეა, მრავლობითი მოტეხილობებით შემოიყვანეს დილის 4 საათზე, მართვით სუნთქვაზეა. ექიმების შეფასებით, მდგომარეობა არის მძიმე", - უთხრეს რადიო თავისუფლებას "ბაუ - საერთაშორისო ჰოსპიტალში".
აჭარის ტურიზმის დეპარტამენტსა და შსს-ში არ აზუსტებენ, რა წინაპირობები უძღოდა ახალგაზრდა კაცის გადმოხტომას.
"[კაცი] ამ ეტაპზე გამოძიების მიერ გაურკვეველი მიზეზით არაადეკვატურად და აგრესიულად იქცეოდა, მოულოდნელად სასტუმროს მე-4 სართულიდან სასტუმროს შიდა ტერიტორიაზე გადახტა", - აღნიშნულია შსს-ს განცხადებაში.
გამოძიება თვითმკვლელობამდე მიყვანის მუხლით არის დაწყებული.
იმის მიუხედავად, რომ განცხადებაში ახალგაზრდის "არაადეკვატურ" და "აგრესიულ" ქცევაზეა ყურადღება გამახვილებული, ვერც შსს-სა და ვერც ტურიზმის ადმინისტრაციაში ვერ ამბობენ, საჭირო იყო თუ დაზარალებულისთვის რაიმე დახმარება კარანტინში ყოფნისას.
შსს-ს ცნობით, 26 წლის ახალგაზრდა სარფის სასაზღვრო-გამტარი პუნქტიდან შემოვიდა, რის შემდეგაც სავალდებულო კარანტინში, თანმხლებ პირთან ერთად გადაიყვანეს.
რადიო თავისუფლებას საავადმყოფოში უთხრეს, რომ დაზარალებულის ოჯახის წევრები დღეს საღამოს მის თბილისში გადაყვანას გეგმავენ.
