ირანი ადასტურებს, რომ კიევს გაუგზავნის შავი ყუთის ჩანაწერებს, რომლებიც ამოიღეს თეირანის თავზე 8 იანვარს ჩამოგდებული უკრაინული სამგზავრო თვითმფრინავიდან.
ირანის სამოქალაქო ავიაციის უწყების ავარიების გამოძიების განყოფილების ხელმძღვანელმა, ჰასან რეზაიფერმა, სააგენტო "ტასნიმს" 18 იანვარს უთხრა, რომ ირანში ჩანაწერები ვერ წაიკითხეს.
მისი თქმით, კიევში ჩატანის შემდეგ ჩანაწერებზე იმუშავებენ საფრანგეთის, ამერიკის და კანადის ექსპერტები.
"თუ ეს წარუმატებელი იქნება, მაშინ შავ ყუთს საფრანგეთში გავგზავნით" - ამბობს რეზაიფერი.
ირანის რევოლუციის გუშაგთა კორპუსის საჰაერო თავდაცვის ძალებმა უკრაინული თვითმფრინავი აფრენიდან მალევე ჩამოაგდეს, რასაც ბორტზე მყოფი 176-ვე ადამიანი შეეწირა.
ინციდენტს ცოტა ხნით უძღოდა წინ ირანის მიერ რაკეტების სროლა ერაყის სამხედრო ბაზაზე, სადაც ამერიკელი სამხედროები არიან განთავსებული. ეს ნაბიჯი, თავის მხრივ, იყო პასუხი აშშ-ის საჰაერო თავდასხმაზე, რომელსაც ირანის სამხედრო მეთაური, გენერალ-მაიორი ყასემ სოლეიმანი ემსხვერპლა.
