სამოქალაქო აქტივისტი, ნატა ფერაძე პოლიციიდან ხელწერილის საფუძველზე გაათავისუფლეს - ეს ინფორმაცია რადიო თავისუფლებას მიაწოდა ფერაძის თანამებრძოლმა, "პარტიზანი მებაღეების" წევრმა მარი ყანჩაველმა.
ფერაძე დააკავეს ადმინისტრაციული წესით, 173-ე მუხლით, რომელიც გულისხმობს სამართალდამცველის კანონიერი მოთხოვნის დაუმორჩილებლობას.
მანამდე "ფეისბუკზე" გავრცელდა ვიდეო, რომელშიც ჩანდა, რომ ფერაძე პოლიციამ დააკავა მაშინ, როცა ის ცირკის მიმდებარე ტერიტორიაზე ესარჩლებოდა ხულიგნობისთვის დაკავებულ ტრანსგენდერ ქალს.
როგორც რადიო თავისუფლებამ შსს-სგან შეიტყო, დაკავებულია ორი ტრანსგენდერი ქალი, 166 და 173 მუხლებით, რომლებიც, შესაბამისად, გულისხმობს ხულიგნობას და სამართალდამცველთა მოთხოვნის დაუმორჩილებლობას.
