განათლების, მეცნიერების, კულტურისა და სპორტის სამინისტრომ 2019 წლის სპორტული სეზონი შეაჯამა. სახელმწიფო ცერემონიების სასახლეში გამართულ ღონისძიებაზე სხვადასხვა ნომინაციაში დაასახელეს საუკეთესოები. მთავარი ჯილდოს - წლის საუკეთესო სპორტსმენის ჯილდოს ექვს კანდიდატს შორის გამორჩეული საქართველოს პრეზიდენტ სალომე ზურაბიშვილს უნდა გამოეცხადებინა, მაგრამ საღამოს წამყვანებმა დამსწრეთ აცნობეს, რომ მთავარ ნომინაციას ერთბაშად ექვსი გამარჯვებული ეყოლებოდა. საქართველოს 2019 წლის საუკეთესო სპორტსმენები გახდნენ: თავისუფალი სტილით მოჭიდავეები ბექა ლომთაძე და გენო პეტრიაშვილი, ბერძნულ-რომაული სტილით მოჭიდავეები ნუგზარ წურწუმია და ლაშა გობაძე, ძალოსანი ლაშა ტალახაძე და ძიუდოისტი ლუხუმ ჩხვიმიანი. შარშან ექვსივე სპორტსმენმა მსოფლიოს ჩემპიონის ტიტული მოიპოვა.
სხვა ნომინაციები ასე გადანაწილდა:
2019 წლის საუკეთესო ნაკრები გუნდი სათამაშო სახეობებში - საქართველოს წყალბურთის ნაკრები
2019 წლის საუკეთესო ახალგაზრდა სპორტსმენი - ლაშა ბექაური (ძიუდო)
2019 წლის საუკეთესო სპორტსმენი არაოლიმპიურ სახეობებში - ვახტანგ ჩიდრაშვილი (სამბო)
2019 წლის საუკეთესო მსაჯი - რუსუდან ხოფერია (ბატუტზე ხტომა)
2019 წლის საუკეთესო ფედერაცია მოპოვებული შედეგების მიხედვით - ჭიდაობის ფედერაცია
2019 წლის საუკეთესო სპორტსმენი ქალი - ეთერ ლიპარტელიანი (ძიუდო)
2019 წლის საუკეთესო მენეჯერი - კახი კახიაშვილი (ძალოსნობის ფედერაციის პრეზიდენტი)
2019 წლის საუკეთესო მწვრთნელი - გიორგი იანტბელიძე (თავისუფალი სტილით მოჭიდავეთა ნაკრების მთავარი მწვრთნელი)
2019 წლის საუკეთესო პარასპორტსმენი კაცი - რევაზ ჩიკოიძე
2019 წლის საუკეთესო პარასპორტსმენი ქალი - ირმა ხეცურიანი
