თალიბანის პრესმდივანმა პაკისტანში გამომავალ გაზეთთან ინტერვიუში თქვა, რომ ექსტრემისტული ჯგუფი აშშ-სთან მოლაპარაკებაში შეთანხმების მიღწევას იანვრის ბოლომდე იმედოვნებს.
სუჰაილ შაჰინის მიერ 18 იანვარს ნათქვამი ამ სიტყვების ფონია თალიბანსა და აშშ-ს შორის ორი დღის განმავლობაში მიმდინარე მოლაპარაკებები ყატარში. მანამდე, 17 იანვარს, შაჰინმა ტვიტერზე დაწერა, რომ შეხვედრა „გამოსადეგი“ იყო.
შაჰინი ამბობს, რომ მოლაპარაკების საგანი იყო ერთობლივი შეთანხმების გაფორმება და ამასთან დაკავშირებული ცერემონია, თუმცა დეტალებს არ აკონკრეტებს. სააგენტო როიტერსი ავრცელებს ორი წყაროს ინფორმაციას, რომ შეთანხმების მიღწევის შემთხვევაში თალიბანი მზად იყო აშშ-ის ძალებთან ცეცხლის ათდღიანი შეწყვეტისთვის, ისევე, როგორც ავღანეთის ძალებთან ძალადობის შემცირებისა და ავღანეთის ოფიციალურ პირებთან მოლაპარაკებისთვის.
