რუსეთი: კანონპროექტი კრძალავს გაჯეტებს რუსული პროგრამული უზრუნველყოფის გარეშე

რუსეთის სახელმწიფო დუმამ მესამე წაკითხვით მიიღო კანონპროექტი სმარტფონებისა და კომპიუტერების გაყიდვის აკრძალვაზე, რომლებზეც არ არის დაყენებული რუსული პროგრამული უზრუნველყოფა.


დოკუმენტის თანახმად, 2020 წლის 1 ივლისიდან სავალდებულოა რუსული პროგრამული უზრუნველყოფის ინსტალირება. პროგრამების სიას სახელმწიფო დაადგენს. კანონპროექტის ახსნა-განმარტებით მინაწერში სმარტფონებისა და კომპიუტერების გარდა ასეთ მოწყობილობებად მიიჩნევა „სმარტ-ტვ“ ფუნქციის მქონე ტელვიზორებიც.


კანონის ავტორები, რომელთა შორის არიან სახელმწიფო დუმის ოთხი ფრაქციის წარმომადგენლები, მიიჩნევენ, რომ მისი მიღება ხელს შეუწყობს რუსული IT კომპანიების განვითარებას და მათ უცხოური კორპორაციების თანაბარ დონეზე დააყენებს. თავად კანონპროექტი, როგორც სახელმწიფო დუმაში ხსნიან, მიმართულია „რუსეთის მომხმარებლების უფლებების დაცვისკენ“.



როგორც გამოცემა The Bell-ი აღნიშნავს, კანონპროექტს, რომელსაც მხარს უჭერს რუსეთის პრეზიდენტის ადმინისტრაცია, არაფორმალურად უწოდებენ „Apple-ის წინააღმდეგ მიმართულ კანონს“. ანონიმმა ჩინოვნიკმა განაცხადა, რომ შეზღუდვები გამიზნულია სწორედ ამ კორპორაციის პროდუქციისთვის. საოპერაციო სისტემა iOS-ი, რომელსაც გამოიყენებს Apple-ი, საერთოდ არ ითვალისწინებს უცხო აპლიკაციების წინასწარი ჩატვირთვის შესაძლებლობას.