ირანმა ოთხი ჟურნალისტი და მშრომელთა უფლებების დაცვის ორი აქტივისტი, მათ შორის, სეფიდე ღოლიანი, საპატიმროდან გაათავისუფლა დიდი გირაოს სანაცვლოდ.
24 წლის ღოლიანმა საპატიმროში ცხრა თვე გაატარა. ის „ამნესტი ინტერნეშენელის“ მოწოდებიდან ერთ დღეში გაათავისუფლეს. მან ხუთდღიანი შიმშილობა ახლახან დაასრულა. ღოლიანი გაუშვეს 120 ათასი დოლარის შესაბამისი თანხის გირაოს სანაცვლოდ.
სააგენტო ისნა იტყობინება, რომ მშრომელთა უფლებების დამცველი მეორე აქტივისტი, ათეფე რანგრიზი ასევე გაათავისუფლეს, მაგრამ პირობების შესახებ დეტალები ცნობილი არაა. რანგრიზი მაისის შემდეგ ჰყავდათ დაკავებული და მანაც იშიმშილა.
საპატიმროში დარჩა მშრომელთა მოძრაობის კიდევ ორი აქტივისტი.
გირაოს გადახდის შემდეგ ირანის ხელისუფლებამ საპატიმროდან გაუშვა ასევე ოთხი ჟურნალისტი. სამი მათგანი, ინტერნეტგამოცემა „გამიში“ მუშაობდნენ, ერთი კი, რეფორმისტული გაზეთის, „შარღის“ ჟურნალისტია.