არა, რატომ უნდა ვიყო [პროკურატურაში]? - ასე უპასუხა საქართველოს პრეზიდენტმა, სალომე ზურაბიშვილმა ჟურნალისტებს, რომლებმაც მას შეწყალების საქმეზე პროკურატურაში მიმდინარე გამოძიებასთან დაკავშირებით ჰკითხეს. მედია დაინტერესდა, იმყოფებოდა თუ არა სალომე ზურაბიშვილი პროკურატურაში მიმდინარე საქმის ფარგლებში. პრეზიდენტმა ეს კომენტარი გააკეთა მცხეთაში, სვეტიცხოვლის ტაძრიდან გამოსვლის შემდეგ. იგი ესწრებოდა სვეტიცხოვლობის დღესასწაულისადმი მიძღვნილ წირვას.
"შეწყალების საქმეზე" ორჯერ გამოკითხეს პრეზიდენტის საპარლამენტო მდივანი დიმიტრი გაბუნია და ადმინისტრაციის უფროსი ანგი ხუციშვილი. ამავე საქმეზე პროკურატურაში გამოკითხვაზე იმყოფებოდნენ პრეზიდენტის ადმინისტრაციის სხვა თანამშრომლებიც.
შეწყალების საქმე
საქართველოს პრეზიდენტმა, სალომე ზურაბიშვილმა მარიამობის დღესასწაულზე 34 მსჯავრდებული შეიწყალა. მათ შორის:
ბათუმელი პოლიციელის, თარაშ მუკბანიანის მკვლელობისთვის მსჯავრდებული, რამაზ დევაძე;
დავით ოთხმეზურის მკვლელობაში მსჯავრდებული ასლან ბეჟანიძე;
მკვლელობაში მსჯავრდებული ზურაბ ნადირაძე.
20 სექტემბერს გენერალურმა პროკურატურამ პრეზიდენტ სალომე ზურაბიშვილის მიერ მკვლელობაში მსჯავრდებულების შეწყალების ფაქტებზე გამოძიება დაიწყო.
პრეზიდენტ სალომე ზურაბიშვილის მიერ შეწყალებულთა სია ამ დრომდე გასაიდუმლოებულია.
თავად სალომე ზურაბიშვილს კი შეწყალებაზე მორატორიუმი აქვს გამოცხადებული.
