ჰუთიტი მეამბოხეები აცხადდებენ, რომ აჩერებენ თავდასხმებს საუდის არაბეთზე

იემენში ირანის მიერ მხარდაჭერილი ჰუთიტი მეამბოხეები აცხადებენ, რომ აჩერებენ საფრენი აპარატებით და რაკეტებით თავდასხმებს საუდის არაბეთზე, ერთ კვირაში მას შემდეგ, რაც პასუხისმგებლობა იკისრეს იერიშზე საუდის არაბეთის მნიშვნელოვან ნავთობის ობიექტზე. 


ჰუთიტების უზენაესი საბჭოს ხელმძღვანელმა, მეჰდი ალ-მაშატმა 20 სექტემბერს, გვიან საღამოს გამოაცხადა, რომ "შეჩერებულია ყველა თავდასხმა საუდის არაბეთის ტერიტორიაზე". მისი თქმით, ჯგუფი ახლა "დადებით გამოხმაურებას" ელის რიადისგან. 


შიიტმა ჰუთიტმა მეამბოხეებმა პასუხისმგებლობა იკისრეს 14 სექტემბერს განხორციელებულ თავდასხმაზე საუდის არაბეთის უდიდეს ნავთობის საწარმოზე, რამაც კიდევ უფრო გაზარდა დაძაბულობა რეგიონში. ჰუთიტების ამ განცხადების მიუხედავად, აშშ-ის და საუდის არაბეთის ოფიციალურმა პირებმა თავდასხმა თეირანს დააბრალეს და გამოვიდნენ გაფრთხილებით, რომ განიხილება პასუხის ყველა გზა, სამხედროს ჩათვლით. ირანი უარყოფს კავშირს ინციდენტთან და აშშ-ს აფრთხილებს, რომ ნებისმიერი თავდასხმა "სრულმასშტაბიან ომს" მოიტანს. 


მიმდინარე წელს ჰუთიტმა მეამბოხეებმა მანამდეც განახორციელეს რამდენიმე თავდასხმა საუდის არაბეთის ობიექტებზე. იემენის მთავრობა, რომელსაც მხარს უჭერენ სუნიტების ხელმძღვანელობით მოქმედი საუდის არაბეთი და მისი არაბული მოკავშირეები, ჰუთიტ მეამბოხეებს 2015 წლიდან ებრძვის.