კახიძე: მოსამართლეებთან გასაუბრება ბევრ რამეს წარმოაჩენს, სასამართლო ხელისუფლება კრიზისშია

„ევროპული საქართველოს“ მთავარი მიზანი გასაუბრების პროცესში ის არის, რომ საზოგადოებამ დაინახოს, თუ რა კანდიდატები წარმოადგინა იუსტიციის უმაღლესმა საბჭომ და ვის არჩევას აპირებს „ქართული ოცნების“ უმრავლესობა“, - განაცხადა „ევროპული საქართველოს“ წევრმა ოთარ კახიძემ. მისი თქმით, იუსტიციის უმაღლეს საბჭოს კანდიდატების ნომინირების შესახებ გადაწყვეტილება დამოუკიდებლად არ მიუღია და, შესაბამისად, გასაუბრების პროცესიც ბევრ რამეს წარმოაჩენს:


„ეს წინასწარ შეთანხმებული და გავლილი სქემაა. ჩვენ ვაცნობიერებთ, რომ იუსტიციის უმაღლეს საბჭოს, ასევე, მართავს კლანი და მათ ვინც გადაწყვიტეს, პარლამენტსაც ისინი წარედგინა. დანარჩენს გვაჩვენებს უშუალოდ გასაუბრების პროცესი“, - განაცხადა ოთარ კახიძემ.


„ევროპული საქართველოს“ წევრები არასამთავრობო ორგანიზაციებთან შეხვედრაზე კანდიდატების მიერ მესამე სექტორის მიერ შესწავლილ ინფორმაციას განიხილავენ.


„მათ ძალიან მოცულობითი სამუშაო გასწიეს. შეისწავლეს უზენაესი სასამართლოს მოსამართლეობის კანდიდატთა პორტფოლიოები, მათი განხილული საქმეები, ფინანსური მხარე. „ევროპული საქართველო“ მიიჩნევს, რომ სასამართლო ხელისუფლება მძიმე კრიზისშია, მას მართავს ე.წ. კლანი, რომელიც უზრუნველყოფს მართლმსაჯულების სისტემის მორჩილებას ბიძინა ივანიშვილისადმი“, - განაცხადა ოთარ კახიძემ.


უზენაესი სასამართლოს უვადო მოსამართლეობის კანდიდატურების განხილვა საქართველოს პარლამენტში 23 სექტემბერს იწყება. იუსტიციის უმაღლესმა საბჭომ პარლამენტს განსახილველად 20 მოსამართლის კანდიდატურა წარუდგინა.