ყაზახეთის პოლიციამ დაშალა ოპოზიციის აქციები, დააკავა 50-ზე მეტი პირი

ყაზახეთის პოლიციამ დაშალა რამდენიმე ქალაქში, მათ შორის, დედაქალაქ ნურ-სულთანში მიმდინარე ოპოზიციის აქციები და დააკავა ათობით პირი. 


რადიო თავისუფლების ყაზახური სამსახურის ცნობით, უსანქციო დემონსტრაციების დაწყების წინ ნურ-სულთანის და ალმა-ატის ქუჩებში პოლიცია დიდი რაოდენობით იყო წარმოდგენილი. როცა ხალხმა ორივე ქალაქში თავშეყრა დაიწყო, პოლიცია სწრაფად ამოქმედდა, აქციები დაშალა და მონაწილეები დააკავა. 


ყაზახეთის შინაგან საქმეთა სამინისტროს ცნობით, ორივე ქალაქში, საერთო ანგარიშით 57 მოქალაქე დააკავეს, რომლებსაც ჯარიმა ან პატიმრობა ემუქრებათ უსანქციო დემონსტრაციებში მონაწილეობისთვის.


აქციები სხვა, უფრო პატარა ქალაქებშიც იყო დაგეგმილი, მათ შორის შიმკენტში, სადაც, რადიო თავისუფლების კორესპონდენტის ცნობით, პოლიციამ სულ მცირე 20 პირი დააკავა. 


აქციების ორგანიზატორია ორგანიზაცია ყაზახეთის დემოკრატიული არჩევანი, რომლის ლიდერიც, მუხტარ აბლიაზოვი, საფრანგეთში ცხოვრობს. ის ძებნილია ყაზახეთის, რუსეთის და უკრაინის მიერ, 5 მილიარდამდე დოლარის გაფლანგვის ეჭვის საფუძველზე.