ირანის ხელისუფლებამ დაადასტურა ერთ-ერთ მის კოსმოსურ ცენტრში ტექნიკური გაუმართაობის გამო მომხდარი აფეთქება მას შემდეგ, რაც გასულ კვირაში გავრცელდა აფეთქების შესახებ სატელიტით გადაღებული სურათები.
ირანის მთავრობის წარმომადგენელმა ალი რაბეიმ გამორიცხა საბოტაჟის შესაძლებლობა და 2 სექტემბერს თქვა, რომ აფეთქება იმამ ხომეინის კოსმოსურ ცენტრში მოხდა „ცდის ეტაპზე“.
„სასტარტო მოედანზე არ გადაუტანიათ არც ერთი თანამგზავრი“, - თქვა რაბეიმ და დაამატა, რომ ინცინდენტს არ გამოუწვევია არავითარი სასიკვდილო შედეგი.
28 აგვისტოს მომხდარი აფეთქება ითვლება ამ წლის განმავლობაში ირანული რაკეტის მესამე წარუმატებელ სტარტად.
აშშ-ს არავითარი შეხება არ აქვს „რაკეტა საფირის ბოლო მოსამზადებელი გაშვების დროს მომხდარ კატასტროფულ ინცინდენტთან“, - დაწერა 30 აგვისტოს ტვიტერში აშშ-ის პრეზიდენტმა დონალდ ტრამპმა, რომლის ტვიტს ახლდა სატელიტური ფოტო აფეთქებული რაკეტისა და სერიოზულად დაზიანებული გამშვები სადგურისა.
