ირანის ტელევიზია: დაკავებული ბრიტანული ტანკერის ეკიპაჟის წევრები უსაფრთხოდ არიან

 ირანმა გამოაცხადა 21 ივლისს, რომ ბრიტანული ტანკერის, „სტენა იმპეროს“ ეკიპაჟის 23 წევრი უსაფრთხოდ არის და თავს კარგად გრძნობს. ლონდონმა დაგმო ტანკერის დაკავება და განაცხადა, რომ ის კანონიერად მოქმედებდა ომანის ტერიტორიულ წყლებში. ჰორმოზგანის პროვინციის ნავსადგურებისა და საზღვაო მიმოსვლის ორგანიზაციის ხელმძღვანელმა, ალაჰმორად აფიფიფურმა ირანის ტელევიზიას უთხრა, რომ „ეკიპაჟის ყველა წევრი უსაფრთხოდაა და თავს კარგად გრძნობს“. მისი ინფორმაციით, ტანკერი ირანის ბანდლარ აბასის ნავსადგურშია და ეკიპაჟის წევრები ხომალდზე დარჩებიან.


ლონდონმა ირანის მიერ ტანკერის დაკავება დაგმო, როგორც „ მტრული ქმედება“ და უარყო თეირანის მტკიცება, თითქოს ტანკერის დაკავება მოჰყვა მის მონაწილეობას მცირე თევზსაჭერ ხომალდთან ინციდენტში. ირანის ისლამურმა რევოლუციურმა გვარდიამ გაავრცელა ვიდეო ჩანაწერი, როგორ იკავებენ მისი მეომრები ხომალდს, რომელზეც მათი გადასხმა შვეულმფრენიდან მოხდა.


ინციდენტებმა ჰორმუზის სრუტეში, რომელიც მნივშნელოვანი სანავთობო-სატრანსპორტო გზაა, გაამწვავა დაძაბულობა დასავლეთსა და ირანს შორის, რასაც შეიძლება შეიარაღებული კონფლიქტი და ნავთობის ფასის, ასევე ტრანსპორტის დაზღვევის გადასახადის ზრდა მოჰყვეს.

 


ბრიტანეთის თავდაცვის მინისტრმა, პენელოპა მორდონტმა ხომალდის დაკავებას უწოდა „მტრული ქმედება“, ხოლო საგარეო საქმეთა მინისტმა, ჯერემი ჰანტმა „უკიდურესი იმედგაცრუება“ გამოხატა ირანელ კოლეგა, ჯავად ზარიფთან სატელეფონო საუბრის შემდეგ.