საქართველოს პრეზიდენტმა სალომე ზურაბიშვილმა „ღირსების ორდენი“ ჩამოართვა ყაზახ ოპოზიციონერ მუხტარ აბლიაზოვს. ამის შესახებ „ეხო კავკაზას“ ინფორმაცია დაუდასტურა საქართველოს პრეზიდენტის პრესსამსახურის თანამშრომელმა ირინა შენგელიამ. „ეს ადამიანი მსჯავრდებულია სისხლის სამართლის მუხლით, ის - ჩვეულებრივი კრიმინალია“, -აღნიშნა პრესსამსახურის თანამშრომელმა.
აბლიაზოვი 2016 წლის 9 დეკემბერს გაათავისუფლეს საფრანგეთის ერთ-ერთი საპატიმროდან, სადაც სასჯელს იხდიდა სისხლის სამართლის რამდენიმე დანაშაულისთვის, მათ შორის ქონების უკანონო მითვისებისთვის, ფულის გათეთრებისა და თანამდებობის ბოროტად გამოყენებისთვის.
მას ხუთი მილიარდი დოლარის გაფლანგვას ედავებოდნენ. საფრანგეთის სასამართლომ გააუქმა ოპოზიციონერის რუსეთისთვის გადაცემის ბრძანება, რადგან მიიჩნია, რომ მისი საქმე პოლიტიკურად არის მოტივირებული.
ყაზახეთის ენერგეტიკის, ინდუსტრიისა და ვაჭრობის ყოფილი მინისტრი მუხთარ აბლიაზოვი 2017 წლის 7 ივნისს ალმა-ატის სასამართლომ დამნაშავედ სცნო რამდენიმე მილიარდი დოლარის მიტაცებაში და 20 წლით თავისუფლების აღკვეთა მიუსაჯა.
თავად აბლიაზოვი ყაზახეთის ფარგლებს გარეთ, საფრანგეთში იმყოფება. მის წინაშე ყაზახეთში რამდენიმე საქმეა აღძრული. 2002 წელს სასამართლომ აბლიაზოვს ექვსი წილით თავისუფლების აღკვეთა მიუსაჯა და გაამწესა საერთო რეჟიმის გამოსასწორებელ კოლონიაში. ყველა ცნობილმა საერთაშორისო უფლებადამცველმა ორგანიზაციამ, მათ შორის „ჰიუმან რაით ვოჩმა“ და „ამნესტი ინტერნეიშენალმა“ აბლიაზოვი სინდისის პატიმრად აღიარა და დაგმო ყაზახეთის ხელისუფლების ქმედება.
2003 წლის 13 მაისს მუხტარ აბლიაზოვი ციხიდან გათავისუფლდა საერთაშორისო საზოგადოების ზეწოლის შედეგად.
2006 წლის 16 ოქტომბერს აბლიაზოვი "ღირსების ორდენით" დაჯილდოვდა მაშინდელი პრეზიდენტის, მიხეილ სააკაშვილის მიერ.
