26 ივნისის მდგომარეობით, თბილისის კლინიკებში რჩება 21-22 ივნისს, რუსთაველის გამზირზე საპროტესტო აქციის დაშლისას დაშავებული 240-დან 10 პაციენტი.
საგანგებო სიტუაციების კოორდინაციისა და გადაუდებელი დახმარების ცენტრის დირექტორი ავთანდილ თალაკვაძე რეგიონულ ჰოსპიტალში მყოფი სამი პაციენტის მდგომარეობას გაეცნო.
„ერთი პაციენტი დღის ბოლომდე პალატაში გადავა. იმ ორი პაციენტიდან, რომელიც მართვით სუნთქვაზე იმყოფება, ერთ-ერთთან გვაქვს საგრძნობი გაუმჯობესება, ის კონტაქტურია, თუმცა ამ დროისთვის იმყოფება დამზოგველ რეჟიმში და ვფიქრობთ, რომ უახლოეს პერიოდში შესაძლებელი გახდება მისი აპარატიდან მოხსნა. მეორე პაციენტთან დაკავშირებით ასევე, სტაბილური ჰემოდინამიკა გვაქვს. მას სავარაუდოდ, უფრო ხანგრძლივი ვადით დასჭირდება რეანიმაციის განყოფილებაში განთავსება, თუმცა მაჩვენებლები გაუარესებული არ არის“ - განაცხადა ავთანდილ თალაკვაძემ.
მისი ინფორმაციით, აქციის დაშლის დროს დაშავებული ერთი ადამიანი გაემგზავრა მიუნხენის საუნივერსიტეტო კლინიკაში, 2 პოლიციელი თურქეთში, „აჯიბადემის“ კლინიკაში გააგრძელებს მკურნალობას, დღეს ღამით კი იგეგმება კიდევ ერთი პაციენტის ისრაელში გამგზავრება რეაბილიტაციის მიზნით.
„ფონდმა „ქართუმ“ გამოხატა მზაობა დაფინანსებასთან დაკავშირებით. დაფინანსების მოცულობის საკითხზე კონკრეტულად ჯერ ვერ გეტყვით, რადგან არ ვიცით, რა შემდგომ დანიშნულებებს მისცემენ პაციენტებს, თუმცა „ქართუ“ მზაობას გამოთქვამს სრული დანახარჯი აანაზღაუროს“ - განაცხადა ავთანდილ თალაკვაძემ.
