გროზნოში შეიარაღებული დაპირისპირების შედეგად სამი ადამიანი მოკლეს.
დაღუპულთა შორის ერთ-ერთი საგზაო საპატრულო სამსახურის თანამშრომელი, ორი კი შეიარაღებული თავდამსხმელია.
ინციდენტი ჩეჩნეთის რესპუბლიკის მეთაურის რეზიდენციის მახლობლად მოხდა. თავდასხმაში ორი ადამიანი მონაწილეობდა, ერთ-ერთი მათგანი ადგილზე მოკლეს, ხოლო მეორე მოგვიანებით, ორმხრივი სროლის დროს დაიღუპა.
Twitter-ზე წერენ იმასაც, რომ თავდამსხმელებს შესაძლოა ISIS-ის მებრძოლებთან ჰქონდეთ კავშირი.
რუსული მედიის ინფორმაციით, რამზან კადიროვის რეზიდენციის წინ საგზაო პოლიციის თანამშრომლებმა საბუთების შემოწმების მიზნით ავტომობილი გააჩერეს, ავტომობილის მძღოლმა პოლიციის თანამშრომელს დანა დაარტყა. ინციდენტის შედეგად დაშავებულია პოლიციელი და გვარდიის თანამშრომელი.
21 ივნისს ეფესბემ პოლიციის მხარდაჭერით საერთაშორისო ექსტრემისტული ორგანიზაციის 11 წევრი დააკავა ყარაჩაი-ჩერქეზეთში, ერთი კი - მოსკოვში. ერბეკას ცნობით, დაკავებულები იყვნენ რუსეთში აკრძალული საერთაშორისო რელიგიურ-ექსტრემისტული ორგანიზაციის, „ატ-ტაკფილ ვალ-ჰიჯრის“ წევრები. როგორც იტყობინებიან, ორგანიზაციის წევრები რადიკალური ისლამის იდეებს ავრცელებდნენ და მუნიციპალური ხელისუფლების ორგანოებში თანამდებობის პირთა გადაყენებას ცდილობდნენ. ორგანიზაციის მიზანი იყო ჩრდილოეთ კავკასიის ტერიტორიაზე სახელმწიფოს შექმნა შარიათზე დამყარებული მმართველობის წესით.
