თურქეთში მმართველი სამართლიანობისა და განვითარების პარტიის კანდიდატმა ბინალი ილდირიმმა სტამბოლის მერის არჩევნებში გამარჯვება მიულოცა თავის ოპოზიციონერ მეტოქეს, ექრემ იმამოღლუს. ილდირიმმა იმედი გამოთქვა, რომ ახალი მერი ღირსეულად ემსახურება სტამბოლის მოსახლეობის ინტერსებს.
პრეზიდენტ რეჯეპ ტაიპ ერდოანის მმართველი პარტიის კანდიდატმა ოპონენტს გამარჯვება მიულოცა რამდენიმე წუთში, მას მერე, რაც თურქეთის მედიაში გავრცელდა ცნობა, რომ იმამოღლუს ხმების 53,6% აქვს ბიულეტენების 95%-ის დათვლის შემდეგ, ხოლო ილდირიმს - 45,4%. დამარცხებული კანდიდატის თქმით, არჩევნებმა აჩვენა, რომ თურქეთის დემოკრატია შესანიშნავად მუშაობს.
იმამოღლუს გამარჯვება იმას ნიშნავს, რომ თურქეთის უდიდესი ქალაქის მმართველობა უკანასკნელი 25 წლის განმავლობაში პირველად აღარ იქნება ერდოანის პარტიის ხელში.
იმამოღლუმ „ახალი დასაწყისის“ პირობა დადო და განაცხადა, რომ მზად არის ითანამშრომლოს ერდოანთან.
49 წლის იმამოღლუმ 31 მარტს მცირე სხვაობით მოიგო არჩევნები. მაგრამ პრეზიდენტმა განაცხადა, რომ ადგილი ჰქონდა დარღვევებსა და კორუფციას და ახალი კენჭისყრის ჩატარება მოითხოვა.
უზენაესმა საარჩევნო საბჭომ 6 მაისს არჩევნების შედეგები ბათილად გამოაცხადა და 23 ივნისისთვის დანიშნა განმეორებითი კენჭისყრა, რასაც საერთაშორისო კრიტიკა მოჰყვა.
ანალიტიკოსთა აზრით, სტამბოლის მერის არჩევნებში მეორე დამარცხება მძიმე დარტყმა იქნება პრეზიდენტ ერდოანისთვის, რომელმაც თავისი პოლიტიკური აღმასვლა სტამბოლის მერობიდან დაიწყო.
არჩევნებში მონაწილეობისთვის რეგისტრირებულია ათ მილიონამდე ამომრჩეველი.