აშშ დათანხმდა, დამატებით „დაახლოებით ათასი“ სამხედრო მოსამსახურე განალაგოს პოლონეთში. პოლონეთის მთავრობა ამგვარად ცდილობს ზომები მიიღოს იმის საპასუხოდ, რასაც ის რუსეთის მზარდ საფრთხედ მიიჩნევს.
მაგრამ აშშ-პოლონეთის ერთობლივ დეკლარაციაში, რომელსაც ტრამპმა 12 ივნისს მოაწერა ხელი, არ არის ლაპარაკი ჯარების მუდმივ განთავსებაზე. ეს სავარაუდოდ შეამცირებს რუსეთის შეშფოთებას მის მეზობელ ქვეყანაში ამერიკის ჯარების შესაძლო განლაგების თაობაზე.
პოლონეთში უკვე იმყოფება როტაციის საფუძველზე აშშ-ის 4500-მდე ჯარისკაცი, რომლებიც იქ განლაგდნენ რუსეთის მიერ 2014 წელს ყირიმის ნახევარკუნძულის ანექსიისა და აღმოსავლეთ უკრაინაში სეპარატისტების მხარდაჭერის საპასუხოდ.
ერთობლივ პრესკონფერენციაზე პოლონეთის პრეზიდენტმა ანდჟეი დუდამ თქვა, რომ უკრაინაში თავისი მოქმედებებით რუსეთი „კვლავაც ავლენს თავის იმპერიალისტურ სახეს“.
ორ ქვეყანას შორის ხელმოწერილი შეთანხმების თანახმად, ამერიკა უახლოეს პერიოდში გაგზავნის პოლონეთში ათასამდე ჯარისკაცს. ტრამპმა დაადასტურა, რომ პოლონეთი შეისყიდის 32 ამერიკულ F-35 გამანადგურებელს. თვითმფრინავების მიწოდების ვადებზე მას არ ულაპარაკია.
შარშან პოლონეთმა წამოაყენა წინადადება, რომ 2 მილიარდ დოლარამდე თანხას გამოყოფს თავის ტერიტორიაზე აშშ-ის მუდმივი სამხედრო ბაზის შესაქმნელად. აშშ-ის პრეზიდენტმა ასევე თქვა, რომ პოლონეთი მზადაა ამერიკული კომპანიებისგან დამატებით შეისყიდოს 8 მილიარდი დოლარის ღირებულების თხევადი ბუნებრივი გაზი. პოლონეთს სურს, გათავისუფლდეს რუსეთის ენერგორესურსებზე დამოკიდებულებისგან. ამჟამად მისი გაზის იმპორტის თითქმის 70% რუსეთზე მოდის.
