აშშ-ის პრეზიდენტი დონალდ ტრამპი მიიჩნევს, რომ ბრიტანეთის ხელისუფლებამ უნდა მიაღწიოს დათმობებს ევროკავშირისაგან, წინააღმდეგ შემთხვევაში ყოველგვარი პირობების გარეშე გავიდეს კავშირიდან.
გაზეთ „სანდეი ტაიმსისათვის“ მიცემულ ინტერვიუში დონალდ ტრამპი ამბობს, რომ ლონდონი უნდა დაემუქროს ბრიუსელს, რომ თუ დათმობაზე არ წავა, მაშინ ბრიტანეთი უარს იტყვის იმ საფასურის გადახდაზე, რაც ევროკავშირიდან გასვლას უკავშირდება. ეს თანა 50 მილიარდ დოლარად ფასდება.
ინტერვიუში დონალდ ტრამპმა ისიც თქვა, რომ ბრიტანეთის ხელისუფლებამ შეცდომა დაუშვა, როდესაც მოლაპარაკებებში არ ჩართო „ბრექსიტის“ წამყვანი მომხრე ნაიჯელ ფარაჟი, ამჟამად პარტია „ბრექსიტის“ ლიდერი, რომელმაც ცოტა ხნის წინ გაიმარჯვა ბრიტანეთში ჩატარებულ ევროპარლამენტის არჩევნებში.
ტრამპი და ფარაჟი ადრეც ხშირად აქებდნენ ერთმანეთს, ხოლო 2016 წელს ბრიტანელი პოლიტიკოსი დონალდ ტრამპის წინასაარჩევნო მიტინგზეც გამოვიდა სიტყვით.
აშშ-ის პრეზიდენტი ასევე აცხადებს, რომ ბრიტანეთის კონსერვატიული პარტიის ლიდერის საუკეთესო კანდიდატად, ტერეზა მეის გადადგომის შემდეგ, ბორის ჯონსონს მიიჩნევს.
აშშ-ის პრეზიდენტი დონალდ ტრამპი სახელმწიფო ვიზიტით 3 ივნისს ჩავა დიდ ბრიტანეთში. რიგი პოლიტიკოსები, მათ შორის თემთა პალატის სპიკერი, აკრიტიკებდნენ ტრამპს და პირდაპირ მოუწოდებდნენ, რომ არ მიეწვიათ აშშ-ის პრეზიდენტი.
მოსალოდნელია, რომ აშშ-ის პრეზიდენტი შეხვდება ბრიტანეთის დედოფალს და ასევე მონაწილეობას მიიღებს მეორე მსოფლიო ომის დროს ნორმანდიაში მოკავშირეთა ჯარების გადასხმის 75-ე წლისთავისადმი მიძღვნილ საზეიმო ღონისძიებაში. ამჯერად ზეიმზე არ დაპატიჟეს რუსეთის პრეზიდენტი ვლადიმირ პუტინი. ღონისძიებაში მხოლოდ იმ ქვეყნების ლიდერები მიიწვიეს, რომელთა მებრძოლებიც მონაწილეობას იღებდნენ გადასხმაში. მიწვეულია ასევე გერმანიის კანცლერი ანგელა მერკელი.