ნინო ბოლქვაძე, რომელიც პირველი ქართველი ლესბოსელი ქალია, რომელმაც საკრებულოს არჩევნებში ღიად იყარა კენჭი, საკუთარი ფეისბუკის გვერდიდან საქართველოს კათოლიკოს პატრიარქს, ილია მეორეს ღია წერილით მიმართავს.
„მერე რა რომ ლესბოსელი ქალი ვარ, მეც ადამიანი ვარ, მეც ამ ქვეყნის შვილი ვარ, რომლისთვის ახლოა სარკმევლის სურნელიც, სხვა ადამიანების გვერდით ლოცვის მადლიც, საკუთარი ცოდვების დაძლევის საჭიროებაც და უსუსურობაც, რომელიც ადამიანად დაბადებას უკავშირდება.
მსურს დაგვინახოთ. არაფერია ჩვენში განსაკუთრებულად საშიში. იგივე ხორცისგან შევდგებით და იგივე ვნებები გვაქვს რაც ნებისიერ სხვას. იგივენაირად გვტკივა და გვიხარია. იგივენაირად ვტირით და განვიცდით. იგივენაირად გვიყვარს ჩვენი ახლობლები და ვცდილობთ გვიყვარდეს მოყვასი მაშინაც როდესაც მას ვძულვართ“, - წერს ნინო ბოლქვაძე.
მისი სიტყვებით, მარტივია პასუხი კითხვაზე თუ რა საჭიროა გარეთ გამოსვლა. არგუმენტს, რასაც ხშირად ისმენენ ლგბტ თემის წევრები, რომ ისინი ამით (გარეთ გასვლით) ცოდვის დემონასტრაციას ახდენენ, რომ საკუთარ სიცოცხლეს საფრთხეში იგდებენ, საზოგადოებაში კი ვნებათაღელვას იწვევენ, აქვს თავისი პასუხი:
„გეტყვით რომ საქართველოში ლგბტ ჯგუფის მიმართ წლების მანძილზე არსებულმა რეპრესიებმა განაპირობა ჩვენდამი შიში, ზიზღი და აგრესია. 2000 წლამდე ციხეში გვსვამდნენ. შემდეგ სენსაციასა და რეიტინგზე ორიენტირებული მედიები ჩვენ ეგზოტიცაციას და შედეგად მეტ მარგინალიზაციას იწვევდნენ.
შეუძლებელია ცხოვრება როდესაც შენს ირგვლივ ადამიანებს ეზიზღები ან როდესაც შენი ეშინიათ. გვსურს ჩვენმა დებმა და ძმებმა დაგვინახონ, რომ ჩვენ არც ურჩხულები ვართ და არც დემონები, მიხვდნენ რომ ჩვენ შორის მსგავსება გაცილებით მეტია ვიდრე სხვაობა. ვიზიარებთ სხვა საზოგადოებების გამოცდილებას და ვხედავთ რომ მხოლოდ ამგვარად შეიძლება გაქრეს ჩვენ შორის უფსკრული, რომელიც არავის არაფერს არგებს“, - აცხადებს ნინო ბოლქვაძ და სთხოვს საქართველოს პატრიარქს გაუგოს მათ და დაეხმაროს რთულ გზაზე.
საქართველოს შინაგან საქმეთა სამინისტრომ ორი დღის წინ გაავრცელა განცხადება, რომ თბილისი პრაიდის ფარგლებში დაგეგმილ ადგილებზე კონკრეტული ფორმატის ღონისძიებების გამართვა შეუძლებელია.
მათ თბილისი პრაიდის ორგანიზატორთა ჯგუფს შესთავაზეს შეკრების სხვა ალტერნატიული, უსაფრთხო ადგილები, რასაც თბილისი პრაიდის ორგანიზატორმა მწვავე რეაქცია მოჰყვა.