7 თვის ჩვილის მკვლელობის საქმის პროკურორი, ნანა გუგუტიშვილი ამბობს, რომ საქმესთან დაკავშირებით ყველა საჭირო ექსპერტიზა კანონით დადგენილ ვადებში ჩატარდება, მათ შორის ფსიქიკურ ჯანმრთელობის დასადგენად ექსპერტიზა ჩაუტარდება 7 თვის ბავშვის მკვლელობაში ბრალდებულ არასრულწლოვან დედას.
პროკურორის თქმით, დანაშაულში ბრალდებულმა სასამართლოზეც დუმილის უფლება გამოიყენა:
„სასამართლომ გაიზიარა ბრალდების არგუმენტები და განუსაზღვრა პატიმრობა. ბრალდებულმა დააფიქსირა პროცესზე, რომ იყენებს დუმილის უფლებას. ამ ეტაპზე საქმის მასალებზე მეტ კომენტარს ვერ გავაკეთებ არასრულწოვნის ინტერესებიდან გამომდინარე“, - განაცხადა საქმის პროკურორმა.
ნანა გუგუტიშვილმა აღნიშნა, რომ დაკავებამდე ბრალდებულმა გამოძიებას საკუთარი პოზიცია მიაწოდა, ბრალდების შესახებ დადგენილების გამოტანის შემდეგ კი დუმილის უფლებით ისარგებლა.
გორის საქალაქო სასამართლომ წინასწარი პატიმრობა შეუფარდა ჩვილის მკვლელობაში ბრალდებულ 16 წლის დედას.
არასრულწლოვანი ბრალდებულისთვის აღკვეთის ღონისძიების სახით პატიმრობის შეფარდების შუამდგომლობა ბრალდების მხარემ დააყენა. ბრალდების მხარის პოზიციას დაეთანხმა ბრალდებულის ადვოკატიც.