ეს არის უზნეო ტყუილი, - ასე შეაფასა საქართველოს პარლამენტის თავმჯდომარის მოადგილემ, გიორგი ვოლსკიმ მედიაში გავრცელებული ინფორმაცია იმასთან დაკავშირებით, რომ, შესაძლოა, 21 აპრილს პანკისის ხეობაში განვითარებული მოვლენები სახელისუფლებო სტრუქტურებში არსებული დაპირისპირების შედეგი იყოს.
ვოლსკი თვლის, რომ პანკისის ხეობაში მომხდარი კარგად არის გასააზრებელი და ვიდრე ყველაფერი არ გაირკვევა, შეუძლებელი იქნება ჰესის პროექტის გაგრძელება.
„ეს არის უზნეო ტყუილი და მოგონილია იმისთვის, რომ საზოგადოებაში რაღაც ეჭვები შეიტანონ, რომ აქ რაღაც კლანებია, სქემებია კორუფციული, ადამიანები ერთმანეთს ებრძვიან. ეს არის ერთი, საკმაოდ კარგად გაერთიანებული ჯგუფი, რომელიც შეიძლება შეცდომას უშვებს, მაგრამ აბსოლუტურად ღია და აბსოლუტურად მართალია თავისი საზოგადოების, თავისი ქვეყნის წინაშე.
მე ვფიქრობ, რომ დასაფიქრებელია ბევრი რამ, რაც პანკისის ხეობაში მოხდა და ყველა საკითხზე სანამ საბოლოო წერტილი არ დაისმება, მაგ პროექტის გაგრძელება არ იქნება შესაძლებელი,“ - განაცხადა გიორგი ვოლსკიმ.
21 აპრილს, პანკისის ხეობაში მოხდა მწვავე დაპირისპირება ადგილობრივ მოსახლეობასა და სამართალდამცველებს შორის. ადგილობრივები მცირე ჰესის („ხადორი 3“) მშენებლობის შეჩერებას ცდილობდნენ, როდესაც ხეობაში საპოლიციო ძალები გამოჩნდნენ. შემდეგ მათ სპეცრაზმიც მოჰყვა.
დაპირისპირების დროს სამართალდამცველებმა ცრემლსადენი გაზი და რეზინის ტყვიები გამოიყენეს. აქციის მონაწილეები კი, ქვებსა და ჯოხებს იყენებდნენ. ხეობაში ვითარების დარეგულირებას ცდილობდა შს მინისტრი გიორგი გახარია.
საგანგებო შეხვედრის დასრულების შემდეგ მან თქვა, რომ ხეობაში ჰესი მხოლოდ იმ შემთხვევაში აშენდება, თუკი ადგილობრივების 90% იქნება მომხრე. ამასთან შს მინისტრმა პირობა დადო, რომ დაისჯება ყველა, ვინც 21 აპრილის ინციდენტის დროს კანონი დაარღვია.
ინციდენტის შემდეგ თელავის რეფერალურ საავადმყოფოში 40 ადამიანი მოხვდა. მათ შორის იყვნენ, როგორც სამართალდამცველები, ასევე აქციის მონაწილეები. შს სამინისტროს ინფორმაციით, სამედიცინო დახმარება 55 ადამიანს გაეწია.
